Karantina izoloi për disa ditë edhe botën e krimit në vendin tonë, që u zgjua menjëherë pas lehtësimit të masave, pasi prej disa ditësh mediat ‘janë pushtuar’ nga atentatorët, bosat e drogës e krimit.
Së fundmi, në kryeqytet është sekuestruar një sasi e konsiderueshme lëndë narkotike, një shumë parash dhe një armë e ftohtë.
Forcat e Posaçme “Shigjetat“, në bashkëpunim me Seksionin për Hetimin e Narkotikëve në Tiranë, bazuar në informacionet e siguruara në rrugë operative nga burime të ndryshme, kanë vënë në pranga shtetasin M. D., 17 vjeç, i cili në momentet e arrestimit ka kundërshtuar me dhunë punonjësit e policisë.
Mirëpo, gjatë kontrollit fizik atij iu gjetën 7 qese me lëndë të dyshuar narkotike të llojit cannabis sativa dhe një shumë lekësh të dyshuara të përfituara nga shitja e lëndëve narkotike.
Nga ana tjetër, në Kavajë u arrestua në flagrancë, për veprat penale “Vrasja me dashje, e mbetur në tentativë, kryer në bashkëpunim” dhe “Mbajtja pa leje e armëve të ftohta”, shtetasi me iniciale I. S., banues në Lushnje, pasi, për motive të dobëta ka plagosur me thikë shtetasin N. C., i cili ndodhet në spital në gjendje të rëndë shëndetësore.
Po ashtu, në cilësinë e provës materiale u sekuestrua mjeti prerës thikë, teksa materialet i kaluan Prokurorisë së Rrethit Gjyqësor Tiranë, për veprime të mëtejshme, bën me dije policia në një njoftim për shtyp.
