“COVID-19 mund të largohet nga vendi ynë në fund të qershorit, ja kategoritë më të rrezikuara”

Google+ Pinterest LinkedIn Tumblr +

Që nga 9 marsi e deri tani, ka shkuar në 304 numri i të prekurve nga COVID-19 në vendin tonë, pasi në 24 orët e fundit janë shënuar 27 raste të reja.

Në total deri më tani janë kryer 2,031 teste, ndërsa një lajm i mirë është shërimi i 13 pacientëve të tjerë, duke e çuar në 89 numrin e të shëruarve nga fillimi i epidemisë në vendin tonë.

Në spitalin Infektiv ndërkohë ndodhen 73 persona, 7 prej të cilëve në terapi intensive, ku dy janë intubuar dhe në spitalin COVID2, “Shefqet Ndroqi”, ndodhen 4 pacientë, dy prej të cilëve janë intubuar.

Pasditen e sotme ndërroi jetë një 75-vjeçar duke e çuar në 17 numrin e viktimave.

Nga fillimi i kësaj jave e deri tani, mjekët kanë deklaruar se tashmë jemi në pikun e epidemisë dhe kjo rritje e bilancit është e prishme.

Pëllumb Pipero, në një lidhje me Skype për ‘Zonë e Lirë’ deklaroi se nga java e tretë e prillit do kemi një rënie graduale të rasteve dhe situata do përmirësohet, megjithatë sipas mjekut epidemia do vijojë deri në fund të qershorit pasi do vijojë një faze e quajtur ‘bishti i epidemisë’.

“Nuk mund ta themi me siguri, por bazuar në historinë e epidemisë në vendet e tjera, nga java e tretë e prillit mund të kemi një përmirësim të gjendjes. Padyshim rastet do vijojnë, por do ketë një rënie graduale. Megjithatë, largimi total i epidemies mund të vijë nga fundi i qershorit.”

Po ashtu, mjeku renditi edhe 6 kategoritë më të rrezikuara nga COVID-19, që janë personat që:

  1. vuajnë nga sëmundjet kardio-vaskulare
  2. vuajnë nga sëmundjet e veshkave
  3. vuajnë nga hipertensioni
  4. vuajnë nga diabeti
  5. kanë probleme me mushkëritë
  6. dhe duhanpirësit.
Shpërndaje
Share.

Komento