Qyteti i Korçës mirëpriti për të 29-in vit radhazi Festivalin Ndërkombëtar të Autorëve dhe Poetëve “Netët Korçare të Poezisë”, një ngjarje që bashkon zëra poetikë nga Shqipëria, Kosova dhe shumë vende të tjera të botës, në një atmosferë të mbushur me ndjesi dhe reflektime përmes vargjeve.
Organizuar nga Biblioteka Publike “Thimi Mitko” në bashkëpunim me Bashkinë e Korçës, festivali synon të ruajë dhe forcojë këtë traditë kulturore në juglindje të vendit.
Drejtoresha e bibliotekës, Jorida Tollkuçi, theksoi se prej gati tri dekadash ky festival ka shërbyer si një urë lidhëse mes poetëve të rajonit dhe më gjerë, duke e pozicionuar Korçën si një qendër të rëndësishme të poezisë ndërkombëtare.
Risia e këtij edicioni ishte pjesëmarrja për herë të parë e poetëve nga Izraeli, ndërsa ndër të ftuarit ishin edhe krijues nga Greqia, Italia dhe Franca.
Gjatë dy ditëve të festivalit, programi përfshiu prezantimin dhe recitimin e poezive, mbjelljen simbolike të “Pemës së Poezisë”, diskutime letrare në ambientet e bibliotekës, promovime librash si dhe vizita në muzeumet e qytetit.
Tollkuçi nënvizoi se ky është një nga aktivitetet më të dashura për qytetin, pasi jo vetëm e pasuron jetën kulturore, por gjithashtu përçon vlera dhe mesazhe përmes artit të fjalës.
Poeti francez Pierre Ech-Ardour, për të cilin kjo ishte vizita e parë në Shqipëri, ndau emocionet e tij mbi eksperiencën në Korçë dhe tha se poezia që ai sjell bart mesazhin e paqes, një mesazh që i flet të gjitha moshave e kombeve. “Paqja është thelbi i çdo vargu që shkruaj,” tha ai.
E ftuara e nderit, Alda Bardhyli, drejtoreshë e Qendrës Kombëtare të Librit dhe Leximit, e cilësoi këtë festival si një pikë referimi për poezinë shqipe dhe si një platformë të rëndësishme ndërkulturore.
Ajo theksoi rolin që “Netët Korçare” kanë luajtur në ndërtimin e urave mes gjuhëve dhe kulturave të ndryshme dhe në promovimin e krijimtarisë poetike në një nivel global.
Poetja Valbona Lola, një prej pjesëmarrëseve të reja të këtij edicioni, recitoi poezinë e saj “Të pres përjetësisht”, e cila rezononte me temën e këtij viti, “Rreze drite”.
Ajo tha se çdo njeri që mban dashuri brenda vetes është një dritë për të tjerët dhe se poezia është forma më e bukur për të shpërndarë këtë dritë në botë.
Mes emocioneve të forta, dialogut mes kulturave dhe pasionit për artin e fjalës, edicioni i 29-të i “Netëve Korçare të Poezisë” u mbyll me sukses, duke lënë pas kujtime të paharrueshme për pjesëmarrësit dhe me premtimin për t’u rikthyer sërish vitin e ardhshëm, në edicionin jubilar. Korça, edhe një herë, u konfirmua si kryeqyteti shpirtëror i poezisë.
