Një dokument prej 23 faqesh i përgatitur nga kompania lobuese amerikane Continental Strategy, të cilin e disponon VoxNews, i kërkon Departamentit Amerikan të Shtetit (DASH) të anulojë shpalljen “non grata” ndaj ish-presidentit dhe ish-kryeministrit të Shqipërisë, Sali Berisha. Në hyrje të dokumentit, thuhet se ky përcaktim ka dëmtuar politikën e jashtme të Shteteve të Bashkuara.
Sipas Continental Strategy, vendimi për të shpallur Berishën ‘non grata’ duhet të anulohet menjëherë, duke theksuar se “shpallja ishte e motivuar politikisht, pa bazë faktike, dëmtoi interesat e politikës së jashtme të SHBA-së dhe kontribuoi në përkeqësimin e situatës në Shqipëri, që sot kritikët e përshkruajnë si një ‘shtet-narkotik’”. Kompania thekson më tej se Berisha nuk është më një figurë aktive politike dhe se heqja e shpalljes do të rikthente “neutralitetin dhe besueshmërinë amerikane në rajon”.
Në dokument citohet edhe ish-diplomati amerikan Jonathan Moore, i cili pretendon se “sanksionet janë vendosur pa asnjë evidencë, vetëm mbi bazë zërash”.
Kompania lobuese vijon argumentimin duke portretizuar Berishën si një lider tradicionalisht pro-amerikan dhe pa precedent penal, ndërsa qeverinë e Edi Ramës e akuzon për lidhje me rrjete kriminale ndërkombëtare, përfshirë edhe kartelin famëkeq të Sinaloas në Meksikë.
Dokumenti i drejtohet Sekretarit të ri të Shtetit, Marco Rubio, duke i kërkuar të anulojë vendimin e paraardhësit Antony Blinken, me argumentin se një veprim i tillë do të përputhej me interesin kombëtar amerikan dhe me axhendën e administratës Trump për të “ndalur politizimin e sanksioneve”.
Në fund të materialit, lobistët ngrenë akuza edhe ndaj USAID dhe rrjeteve të financuara nga George Soros, duke pretenduar se reforma në drejtësi në Shqipëri është përdorur si “armë politike” kundër opozitës.
