Seanca konstituive e Kuvendit të Kosovës vijoi sërish pa ndonjë zgjidhje konkrete për çështjen e krijimit të komisionit zgjedhor për zgjedhjen e kryetarit të Kuvendit.
Kryesuesi Avni Dehari bëri një tjetër thirrje ndaj partive parlamentare që ende nuk kanë dorëzuar emrat e përfaqësuesve të tyre në komision, por as kësaj radhe nuk pati asnjë propozim të ri.
Në sallën plenare ishin të pranishëm 90 deputetë. Megjithatë, procedura vijoi me votimin e komisionit me përbërjen që ishte propozuar më herët. Rezultati: 53 vota pro, 1 kundër dhe asnjë abstenim.
Në këto kushte, Dehari njoftoi se punimet e seancës do të vazhdojnë më 27 maj, në orën 11:00.
Pas përfundimit të seancës, përfaqësuesit e partive politike riafirmuan pozicionet e tyre. Deputetja e Vetëvendosjes, Donika Gërvalla, akuzoi opozitën për bllokimin e punimeve dhe u bëri thirrje deputetëve që të mos e pengojnë procesin në dëm të qytetarëve.
Në të kundërt, nënkryetarja e PDK-së, Vlora Çitaku, drejtoi gishtin nga Vetëvendosje dhe kryeministri Albin Kurti, duke e quajtur atë përgjegjës për ngërçin aktual.
Ajo deklaroi se PDK-ja është e hapur për të ofruar alternativa që mund të ndihmojnë në tejkalimin e situatës.
