Kryetari i Parlamentit të Kosovës, Glauk Konjufca, në fjalën e tij gjatë seancës parlamentare të përbashkët të Shqipërisë dhe Kosovës në Prishtinë, theksoi se Shqipëria dhe Kosova janë gjithmonë në krah të njëra-tjetrës, pa kushte.
Ai nënvizoi se bashkëpunimi parlamentar ndërmjet dy shteteve është rritur në një nivel tjetër dhe se të dyja shtetet synojnë të bëhen pjesë e të njëjtës familje, Bashkimit Europian.
Konjufca falënderoi Shqipërinë për mbrojtjen që i ka ofruar Kosovës në forume ndërkombëtare.
Ky përbashkim i yni sot përbën më shumë se simbolikë. Kjo seancë duhet parë si dëshmi se Kosova e Shqipëria janë me njëra-tjetrën pa asnjë kusht. Ne duhet të përfaqësojmë një komb, që për ne është i përbashkët. Bashkëpunimin parlamentar e kemi ngritur në nivel tjetër e kjo për ne ka qenë një arritje e konsiderueshme. Shqipëria e Kosova synojnë të njëjtën familje, BE-në. Kosova mbetet kampion i demokracisë në rajon dhe me këtë duhet të krenohemi si popull. Shqiptarët kanë qenë aleati më i natyrshëm i vlerave perëndimore në Ballkan. Falënderojmë Tiranën për mbrojtjen e Kosovës në forumet e botës. Kosova ka në krah Republikën e Shqipërisë. Në fund dëshiroj të uroj shqiptarët në shtetet tona për festat e fundvitit dhe urojmë një vit më të mirë për të gjithë, tha Konjufca.
