Kryeparlamentari i Kosovës ka mbajtur një fjalim në Parlamentin Europian ku ka thënë se BE duhet të liberalizojë vizat për Kosovën.
Konjufca foli në Samitin e Dytë të Parlamentit Evropian me kryetarët e Parlamenteve të Ballkanit Perëndimor, ku ishte temë roli themelor të parlamenteve në procesin e zgjerimit të BE-së në epokën pas COVID-it dhe forcimi i mëtejshëm të bashkëpunimit parlamentar.
Gjithsesi Konjufca u shoreh se mosliberalizimi i vizave nuk është justifikim për të mos përmbushur detyrat e shtëpisë.
“Reformat në drejtësi, ekonomi, administratë e arsim janë të pazëvendësueshme. Forcimi i demokracisë dhe sundimi i ligjit, lufta e vendosur kundër korrupsionit dhe fuqizimi i transparencës, si dhe mbrojtja e pa kompromis e të drejtave të njeriut dhe pakicave janë ‘sine qua non’ i shoqërive të lira e të hapura”, tha Konjufca.
Kreu I Kuvendit të Kosovës foli edhe për domosdoshmërinë e antëarësimit të vendit në BE e po ashtu nevojën që unioni ka që të marrë në gjirin e vet Ballkanin Perëndimor.
“Në të njëjtën masë që për ne është domosdoshmëri bashkimi në familjen evropiane, po sipas të njëjtës nevojë BE-ja e ka të domosdoshme përfshirjen e Ballkanit Perëndimor në gjirin e vet. Mësimet e duhura i kemi të gatshme në histori”, tha ai.
Konjufca përmendi edhe luftat në Ballkan ku ndërhyrja ndërkombëtare politiko-ushtarake i dha shans paqes.
“Pse t’i djegim duart pa nevojë në një mori luftërash që nuk janë tonat – thoshte motoja e tyre. Por pikërisht kjo qasje rrezikoi që zjarri të përhapej përtej Ballkanit. Ishte pikërisht ndërhyrja ndërkombëtare politiko-ushtarake në Ballkan më 1995 e 1999 ajo që i dha shans paqes dhe e stabilizoi rajonin tonë”, deklaroi Konjufca.
Në fund Konjufca tha se projktet që po shfaqen dy vitet e fundit, si mini-shengeni nuk kanë funskion që zëvendëson integrimin e BP në Europë me një moratorium, derisa të jetë vetë BE që do ta kryejë thellimin e saj.
“Nëse krijohet një konsensus evropian ndaj kësaj strategjie, dëmi që do t’i bëhet Ballkanit Perëndimor do të jetë kolosal. Shpresoj shumë që projektet të cilat po shfaqen këto dy vitet e fundit nën formën e platformave të ‘bashkëpunimit rajonal’ si puna e mini-Shengenit, nuk e kanë funksionin e biberonit që e zëvendëson integrimin e BP në BE me një moratorium deri sa BE-ja ta kryejë thellimin e vet”, theksoi kreu i Kuvendit të Kosovës.
