Një konflikt i hershëm mes dy personave ka përfunduar në mënyrë tragjike mbrëmjen e sotme në Memaliaj, ku përdorimi i armës së zjarrit la pas një viktimë dhe një të plagosur rëndë.
Viktimë ka mbetur 30-vjeçari Endri Goxhaj, i cili humbi jetën pasi u qëllua me armë zjarri.
Sipas informacioneve paraprake, autori i dyshuar është 29-vjeçari Donaldo Nela, i cili dyshohet se pas përshkallëzimit të konfliktit ka hapur zjarr ndaj tij.
Ngjarja bëhet edhe më e rëndë, pasi nga të shtënat ka mbetur i plagosur edhe vëllai i autorit, 25-vjeçari Dario Nela. Ende nuk janë të qarta rrethanat se si ai u përfshi në përplasje, por mësohet se ka marrë katër plumba, dy në mushkëri, një në bark dhe një në shpretkë. Aktualisht ai ndodhet në sallën e operacionit, në gjendje të rëndë.
Krimi ndodhi pranë një lokali në qendër të qytetit, duke shkaktuar panik tek të pranishmit. Pas të shtënave, autori u largua menjëherë nga vendngjarja në drejtim të paditur.
Forcat e policisë mbërritën në vendngjarje dhe kanë ngritur postblloqe për kapjen e autorit, ndërsa grupi hetimor po punon për zbardhjen e plotë të rrethanave dhe dokumentimin e kësaj ngjarjeje të rëndë që ka tronditur Memaliajn.
