Prej orës 14:30 në Bruksel po zhvillohet Konferenca e Donatorëve për Rindërtimin pas tërmetit tragjik të 26 nëntorit, që la mijëra persona të pastrehë.
Presidentja e Komisionit Europian, Ursula von de Leyen, ka mbajtur fjalën e saj në hapjen e Konferencës, gjatë të cilës është shprehur se BE do të japë 100 milionë euro për Shqipërinë.
Ndërkohë, pak para nisjes së Konferencës kryeministri Edi Rama ka firmosur marrëveshjen për dhurimin e 15 milionë eurove nga Komisioni Europian.
Po ashtu, disa shtete kanë kanë bërë publike shumat që do ofrojnë: Suedia- 5.6 milionë euro, Britania e Madhe 1 milion pound, Kroacia-1 milion euro.
Kësaj liste së fundmi i është bashkuar Gjermania, që ka dhuruar 11 milionë euro, duke u bërë shteti me më shumë para të dhuruara deri tani, ndonëse Konferenca do vijojë deri në mbrëmje.
Ministri i Jashtëm Federal Heiko Maas deklaroi sot në Konferencën e Donatorëve për Rindërtimin në Shqipëri pas tërmetit të 26 nëntorit 2019:
“Tërmeti i rëndë i nëntorit, që goditi Shqipërinë, mori 51 jetë njerëzish dhe shkaktoi dëme serioze. Gjermania ofroi menjëherë ndihmën e saj nëpërmjet ekspertëve të Agjencisë të Asistencës Teknike. Por tani bëhet fjalë për rindërtimin. Qytetarët në zonat e prekura kanë nevojë për banesa, shkolla dhe kopshte. Gjermania vë në dispozicion për këtë 11 milionë euro. Është një dëshmi e fortë e solidaritetit të BE-së me Shqipërinë fakti që Komisioni Evropian po koordinon asistencën ndërkombëtare të emergjencës dhe ka thirrur për këtë qëllim konferencën e sotme të donatorëve.”
Nga ana tjetër, në një intervistë për Deutsche Wellen ministri i Rindërtimit, Arben Ahmetaj është shprehur se pret që në “kombinim me grante dhe kredi të arrihet të mblidhet një ndihmë rreth 450 milionë euro” për Shqipërinë, megjithatë ai thekson, se nevojat janë shumë më të mëdha.
