Ministri i Shtetit për Rindërtim, Arben Ahmetaj ka sqaruar me detaje shumën e mbledhur sot në Konferencën e Donatorëve për Shqipërinë.
Ahmetaj u shpreh se 1.15 miliardë euro janë në formë financimesh direkte, investime për ndërtime banesash, rikonstruksione të infrastrukturës, granteve, huave dhe mbështetjes për programe zhvillimi.
Ministri tha për “Opinion”, se 400 milion euro janë grante, ndërsa pjesa tjetër janë kredi të buta, disa nën interes 2% dhe pjesa tjetër gati tek 1%.
“Ishte një mbështetje ndërkombëtare spektakolare me solidaritet me popullin shqiptar dhe me familjen që kanë humbur të dashurit dhe shtëpitë e tyre, ishte në një nivel të papërshkrueshëm. Tani, 400 milionë janë grante, që janë para që na i dhurojnë, nuk janë borxhe, pra janë donacione të drejtpërdrejtë. Rreth 650 milionë janë kredi të buta, me një kosto shumë të ulët, si në aspektin e interesit nuk janë kredi tregtare. Disa i kanë nën 2 % interes, janë disa interesa gati-gati tek 1. Këto janë të asociuara më të gjithë dëmin që kemi pasur ne më 26 nëntor dhe po ta lexosh të gjithë raportin e BE dhe parimet, qoftë janë të raporti, qoftë u nënvizuan sot, shkojnë përtej thjesht rindërtimit shkojnë tek rimëkëmbja ekonomike”, tha Ahmetaj.
Shuma e mbledhur në Konferencën e Donatorëve ka kaluar shumën e 1.08 miliardë dollarë, që ishte edhe fatura e dëmeve të llogaritura nga qeveria shqiptare.
Pas përfundimit të Konferencës, presidentja e Komisionit Europian, Ursula von der Leyen, e cila ishte organizatore, deklaroi se procesi i rindërtimit do të mbikëqyret nga BE.
