Ish-deputeti i PD-së Xhemal Gjunkshi, me anë të një video të shpërndarë në “Facebook” tregon gjendjen e disa zonave në Dibër, për shkak të përmbytjeve.
Gjunkshi akuzon Ramën, se favorizon kompani të caktuara për mirëmbajtje rrugësh, por se çdo gjë shkatërrohet nga shirat, gjë që nënkupton se puna që kryhet nga kompania që paguhet për mirëmbajtje nuk është aspak e mirë.
Firma “Alko Impex” e Arbër Abazit, e përkëdheluara e qeverisë e paaftë të menaxhojë situatën, shkruan Gjunkshi.13 fshatra të Zall Dardhës dhe Reçit prej dy ditësh qëndrojnë të izoluar.
Ky është përroi i Lashkizës, i cili ka shkatërruar rrugën në hyrje të Zall Dardhës. Përroi ka mbushur me inerte tobinon dhe ka dalë sipër, duke gërryer rrugën dhe duke e bërë atë të pa kalueshme.
Edhe pse ka dy ditë e dëmtuar, firma që ka mirëmbajtjen e rrugës ka dërguar një fadromë të vogël dhe ende nuk ka mundur të rregullojë rrugën, dhe as ta bëjë të kalueshme atë. Kjo situatë nxori zbuluar dhe tregoi se kompania “Alko Impex” që ka marrë mirëmbajtjen e rrugës është favorizuar dhe ka marrë tenderin me vlerën maksimale, në mënyrë abuzive.
Shembja e Urës
Ish-deputetja e PD-së, Lindita Metaliaj deklaroi sot se është shkatërruar rruga Lezhë-Ungrej, ndërsa banorët e kësaj zone janë të izoluar e të braktisur.
Në reagimin e saj, Metaliaj tha se rruga lidhëse e njësisë administrative Ungrej me Lezhën është dëmtuar rëndë duke u bërë e pakalueshme.
“Qindra banorë të fshatrave Ungrej aktualisht janë të izoluar nga shembja e rrugës. Deri në këto momente askush nuk ka shkuar të inspektoje zonën Ungreji i braktisur dhe i harruar nga qeveria e harresës dhe hajdutërisë”, tha ajo.
