Ditën e sotme Krimi Ekonomik sekuestroi 12 milion euro pasuri në pronësi të trafikantit fierak Arjan Shanaj.
Ky i fundit është arrestuar në Greqi me 800 mijë euro kokainë.
Deri në momentin e arrestimi, ai jetonte në një vilë përrallore në Kavuri, në periferi të Athinës.
‘Dosja.al’ shkruan se Shanaj ka qenë i përfshirë në trafikun e drogës në Spanjë dhe Itali.
Drejtuesit e kësaj organizate kishin lidhje me një kartel droge në Kolumbi, nga ku siguronin lëndën narkotike.
Nga Amerika Latine droga sillej në Ballkan dhe pas përpunimit në Shqipëri dhe Kosovë, dërgohej në Trikalla.
Në Greqi hynte në lojë biznesmeni Sakis Karatzounis, i cili magazinonte drogën që sillinin shqiptarët.
Lënda narkotike më pas dërgohej në Athinë dhe Mikonos ku shitej për klientët VIP.
Një gr kokainë kapte vlerën e 100 eurove.
Ishte DEA që dha informacione, se një sasi kokaine me logon e “Playboy” ishte nisur nga Amerika Latine për në Ballakan.
Hetimi nisi në prill të 2017-ës, kur një person i dha informacione në rrugë operative policisë, për grupin e përbërë nga shqiptarët dhe grekët.
Më pas policia greke vuri nën përgjim një shqiptar me emrin Mirel, që shpërndante drogën me një makinë tip “Nissan”.
Nga përgjimet u zbuluan anëtarët e tjerë të grupit dhe Arjani.
