Kontrolli i Lartë i Shtetit duket se ka filluar aksionin ndaj qeverisë, dhe jo vetëm. Pas zgjedhjes së Arben Shehut në krye të këtij institucioni, tashmë qetësia ka mbaruar.
Ditën e djeshme KLSH njoftoi se kishte ofruar hapësirën e saj për qytetarët dhe zyrtarët, për të denoncuar strukturat e vetë institucionit që mund të abuzojnë ose të jenë të përfshira në raste korrupsioni.
Pra, ky është një mesazh i qartë se KLSH është duke kontrolluar dhe për të çuar përballë përgjegjësisë ata që janë të korruptuar, në mënyrë që gjykata të japë dënimin e merituar. Para se të nisë betejën në përballje me rastet e korrupsionit edhe në qeveri, duket se KLSH ka zgjedhur që fillimisht të fitojë betejën me veten.
Më herët, kreu u KLSH Arben Shehu kishte bërë apel për ministrat e rinj që të tregohen të kujdesshëm e të zbatojnë vetëm ligjin, pasi KLSH do të ishte aty për të bërë detyrën e saj.
Mësohet se ka dosje të KLSH-së për ministrinë e Brendshme, ashtu siç ka edhe njerëz në pranga. Hetime të forta ka edhe nga ana e SPAK dhe të tjerë emri i të cilëve është përmendur në dosje dhe pritet të shkojnë së shpejti para drejtësisë.
Numri i dosjeve mund të jetë mbi 80, dhe në to problematikat janë nga të gjitha institucionet. KLSH ka gjetur shkelje proceduriale, abuzime me tendera, abuzim nga ana e drejtuesve, pagesa etj.
Ky shihet si një mesazh i qartë për qeverinë dhe kabinetin e ri, duke hetuar korrupsionin dhe duke çuar në SPAK e në prokurori dosje të tëra.
Veç SPAK-ut, tashmë është edhe KLSH që me kontrollet dhe auditimin e saj po tenton të çojë dhjetra zyrtarë të korruptuar përballë drejtësisë. KLSH jo vetëm ka çuar në SPAK zyrtarë, por ka përgatitur dosje të mirëfillta hetimore për të korruptuarit.
Reagimi i KLSH tregon se ky institucion ka nisur një punë serioze në mënyrë që zyrtarët e korruptuar të shkojnë përballë drejtësisë, por jo vetëm kaq. Ky aksion mund të shihet edhe si një shtysë dhe një thirrje për të respektuar ligjin.
