Këshilli i Lartë Gjyqësor i ka dërguar sot një shkresë lajmëruese Ardian Dvoranit, me anë të së cilës i komunikohet përfundimi i qëndrimit në detyrë si gjyqtar i Gjykatës së Lartë që prej viti 2005.
KLGJ vlerëson se asnjë nga tre anëtarët e rinj të Gjykatës së Lartë nuk e zëvendëson nominalisht Dvoranin, por secili prej tyre është emëruar për një mandat 9-vjeçar.
“KLGJ vlerësoi se asnjë nga gjyqtarët e rinj të Gjykatës së Lartë nuk iu zëvendëson nominalisht, pasi secili prej tyre ështe emëruar për një mandat 9-vjeçar. Por nga ana tjetër emërimi dhe fillimi i ushtrimit të detyrës nga tre gjyqtarët e rinj në situatën e mospasjes edhe të një pozicioni tjetër të lirë të mëvonshëm në këtë gjykatë që duhet të plotësohet nga radhët e juristëve të spikatur, pa asnjë mëdyshje ka çuar në përfundimin e detyrimit tuaj për qëndrimin në detyrë.”
Në vendimin e KLGJ, ndër të tjera thuhet:Për ju ka përfunduar mandati për të qëndruar në detyrë. Jeni emëruar në Gjykatën e Lartë më 17.02.2005. Mandati juaj ka mbaruar në mënyrë normale pas 9 vjetësh.
Po ashtu, KLGJ-ja e fton të shprehë qëndrimin në lidhje me të drejtën për të ushtruar profesionin pranë një gjykate apeli.
Mësohet se shkresa Dvoranit i ka mbërritur që ditën e djeshme, dhe ai planifikon të kundërshtojnë vendimin përmes rrugëve ligjore.
Kujtojmë që me mbarimin e mandatit në Gjykatën e Lartë, Dvorani largohet edhe nga Këshilli i Emërimeve në Drejtësi për shkak të detyrës si anëtar i Gjykatës së Lartë.
