Në prangat e policisë së Elbasanit ka rënë një 31-vjeçar, si dhe është shpallur në kërkim bashkëpunëtori i tij një 30-vjeçar. Sipas burimeve zyrtare nga policia dy të rinjtë dyshohet se kanë mbjellë lëndë narkotike në një zonë të pyllëzurar në fshatin Krrabë e Vogël në Elbasan. Mësohet se është arrestuar në flagrancë shtetasi me inicialet A.D., ndërsa është shpallur në kërkim shtetasi me inicialet L.B.. Ky i fundit në mmentin që kanë mbërritur uniformat blu i ka kanosur ato dhe është larguar në thellësi të pyjeve.
Njoftimi i plotë:
Elbasan
Evidentohet dhe goditet një tjetër rast i kultivimit të bimëve narkotike.
Arrestohet në flagrancë një shtetas, shpallet në kërkim policor bashkëpunëtori i tij, si dhe procedohet penalisht në gjendje të lirë një shtetas tjetër.
Shërbimet e Komisariatit të Policisë Elbasan, në vijim të kontrolleve të pandërprera të territorit, me qëllim evidentimin dhe goditjen e rasteve të kultivimit të bimëve narkotike, kanë konstatuar bimë narkotike kanabis të kultivuara në një zonë të pyllëzuar në fshatin Krrabë e Vogël, Elbasan.
Në vijim të veprimeve, specialistët për Hetimin e Krimit në Komisariatin e Policisë Elbasan arrestuan në flagrancë shtetasin A. D., 31 vjeç, banues në Tiranë.
Gjithashtu është shpallur në kërkim policor bashkautori i dyshuar i kultivimit të bimëve narkotike, shtetasi L. B., 30 vjeç, banues në Farkë, Tiranë. Ky shtetas, kur ka parë shërbimet e Policisë që po ushtronin kontroll në territor, i ka kanosur ata dhe ka mundur të largohet në një zonë të pyllëzuar. Vijon puna intensive për kapjen e tij.
Në vijim të veprimeve është proceduar penalisht në gjendje të lirë shtetasi M. B., për moskallëzim krimi.
Materialet hetimore i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
