Policia Kufitare në Vlorë ka ndërhyrë me shpejtësi për të shpëtuar 8 pushues që kishin mbetur të bllokuar në det si pasojë e problemeve me mjetet e tyre lundruese.
Rasti i parë u regjistrua rreth 1 milje larg zonës së Shën Janit, ku katër persona kishin mbetur në det për shkak të një defekti në gomonen me të cilën po lundronin.
Menjëherë pas njoftimit nga Stacioni i Policisë Kufitare Triport, u organizua ndërhyrja dhe mjeti i policisë bëri të mundur rimorkimin e gomones deri në stacion, së bashku me pushuesit, të cilët ndodheshin në gjendje të mirë shëndetësore.
Ndërkohë, në një rast të dytë, katër pushues të tjerë kishin mbetur të bllokuar në det në zonën e Porto Palermos, ndërsa po lundronin me kanoe.
SPK Dhërmi mori njoftimin dhe ndërhyri menjëherë, duke i shoqëruar të sigurt në breg.
Policia Kufitare thekson se të gjithë personat janë në gjendje të mirë shëndetësore dhe siguron se do të vijojë patrullimet dhe reagimet e menjëhershme për garantimin e sigurisë në hapësirat detare.
