Kreu i grupit parlamentar të PD, Gazmend Bardhi, është paditur sërish në Gjykatën e Posaçme kundër Korrupsionit dhe Krimit të Organizuar për “shpifje” dhe “fyerje”. Padia është ngritur nga Shoqëria Korporata Elektroenergjitike Shqiptare (KESH) SH.A.
Shorti ka caktuar gjyqtaren Etleva Deda për shqyrtimin e çështjes, ndërkohë që pritet të përcaktohen datat për seancat gjyqësore.
Më herët, Gjykata e Posaçme shpalli të pafajshëm Bardhin, i cili ishte kallëzuar për “shpifje të kryer botërisht”. Padia lidhej me një deklaratë të tij të bërë më 18 tetor të vitit të kaluar, ku akuzonte OSHEE-në për manipulimin e humbjeve të energjisë elektrike në rrjet. Për këtë deklaratë, Bardhi ka bërë një kallëzim penal në SPAK, duke dyshuar për shpërdorim detyre nga ana e funksionarëve të OSHEE-së.
