Kërkuan lehtësimin e masës së sigurisë, Gjykata e Lartë rrëzon Berishën e Malltezin

Gjykata e Lartë në Shqipëri ka refuzuar kërkesën e ish-Kryeministrit Sali Berisha për heqjen e ndalimit të pjesëmarrjes në seancat parlamentare. Berisha, i cili është në arrest shtëpie që nga 30 dhjetori i vitit 2023, po hetohet nga SPAK për çështje të privatizimit të ish-klubit Partizani. Kjo masë u vendos pasi nuk u respektuan masat paraprake të “detyrimit paraqitje” dhe ndalimit të daljes jashtë vendit.

Një rast i ngjashëm ka ndodhur edhe me Jamarbër Malltezin, të cilit gjithashtu i është refuzuar kërkesa për heqjen e arrestit në shtëpi, vendosur nga apeli i posaçëm më 21 nëntor.

Ish-Kryeministri Berisha ka deklaruar se masat e sigurisë janë politike dhe të ndikuara nga kryeministri aktual, Edi Rama. Ai argumenton se këto masa synojnë të pengojnë aktivitetin e tij politik dhe të dëmtojnë statusin e tij si deputet, pasi mungesa e tij në seancat parlamentare mund të çojë në humbjen e mandatit të deputetit për shkak të mungesës prej pothuajse 6 muajsh.

Avokatët e Berishës kanë theksuar se vendosja në arrest shtëpiak është bërë me qëllim për të “djegur” mandatin e tij si deputet. Deri më tani, të gjitha kërkesat e ish-Kryeministrit në gjykatat shqiptare janë refuzuar.