Gjykata e Lartë ka rrëzuar rekursin e paraqitur nga 15-vjeçari Mario Perlleshaj, i akuzuar për vrasjen e Martin Canit, duke lënë në fuqi masën e sigurisë “arrest me burg”.
Në vendimin e saj, Gjykata vendosi të mos pranojë rekursin kundër vendimit të Gjykatës së Apelit të Juridiksionit të Përgjithshëm, të datës 17 dhjetor 2024, duke i mbyllur kështu të gjitha mundësitë për një masë më të lehtë sigurie.
Aktualisht, i mituri ndodhet në Institutin e të Miturve në Kavajë. Ai kishte kërkuar një masë më të butë, por kjo kërkesë është refuzuar në të gjitha instancat gjyqësore.
Vetëm pak ditë më parë, Gjykata e Tiranës vendosi që çështja penale ndaj tij të kalojë për gjykim të rregullt, duke refuzuar aplikimin e gjykimit të shkurtuar, çka do të thotë se, në rast dënimi, ai nuk do të përfitojë uljen me 1/3 të dënimit.
Ndërkohë, familjarët e viktimës Martin Cani vijojnë të kërkojnë drejtësi dhe transparencë nga organet e drejtësisë në trajtimin e kësaj ngjarjeje të rëndë.
