Gjykata e Posaçme kundër Korrupsionit dhe Krimit të Organizuar ka shtyrë për datën 26 qershor seancën ndaj kreut të Partisë së Lirisë, Ilir Meta, i cili ndodhet në burg prej 21 tetorit 2024, nën masën e sigurisë “arrest me burg”.
Meta nuk ishte i pranishëm në sallë, por u përfaqësua nga avokati i tij, Kujtim Cakrani, i cili kërkoi lirimin e klientit të tij pas gati tetë muajsh qëndrimi në paraburgim.
Gjatë seancës, Cakrani u shpreh se akuzat ndaj Metës po zbehen, duke theksuar se prokuroria ka hequr dorë nga akuza për lobim.
Ai theksoi se seanca u shty për t’u njohur me dokumentacionin e ri që ka paraqitur prokuroria.
“Prokurori deklaroi sot se akuza për lobimin nuk qëndron më. Kjo është një zhvillim i ri dhe për këtë kërkova shtyrjen e seancës, për t’u njohur me aktet. Dua të jem i qartë: unë jam avokati i Ilir Metës, jo i bashkëshortes apo i ndonjë familjari tjetër. Në asnjë dokument nuk përmendet emri i tij si përfitues pasurie,” tha Cakrani.
Sipas avokatit, nga hetimet e kryera brenda dhe jashtë vendit, përfshirë Shqipërinë, vendet e Bashkimit Evropian dhe SHBA, nuk është gjetur asnjë pasuri në emër të Ilir Metës.
“SPAK ka kërkuar gjithandej dhe nuk ka zbuluar as pasuri të luajtshme, as të paluajtshme. Le të shkojnë edhe në hënë, ndoshta gjejnë ndonjë pronë”, ironizoi ai.
Cakrani e cilësoi situatën si një “inkuizicion politik” ndaj kreut të Partisë së Lirisë dhe kërkoi që drejtësia të reflektojë mbi masën e sigurisë së aplikuar ndaj tij.
Ilir Meta dhe bashkëshortja e tij, Monika Kryemadhi, janë nën hetim nga SPAK për korrupsion, pastrim parash dhe mosdeklarim të pasurisë.
