Gjykata e Apelit të Posaçëm ka refuzuar kërkesën e kryebashkiakut të Tiranës, Erion Veliaj, për heqjen e sekuestros së celularit.
Ky vendim u mor pas shqyrtimit të ankimimit nga gjyqtari Engert Pëllumbi. Po ashtu, një ditë më parë, Gjykata e Shkallës së Parë ka lënë Veliajn në qeli, duke rrëzuar edhe ankimin e biznesmenit Elman Abule, i cili do të mbetet nën arrest shtëpie.
Në seancën e sotme në Gjykatën e Lartë do shqyrtohet rekursi i vëllait të Veliajt, Arbër Veliaj, për sekuestrimin e celularit.
Veliaj u arrestua më 10 shkurt në zyrën e tij të Bashkisë Tiranë, i akuzuar për “Korrupsion pasiv të funksionarëve të lartë shtetërorë ose të zgjedhurve vendorë”, kryer në bashkëpunim, dhe “Pastrimi i produkteve të veprës penale”.
Po ashtu, bashkëshortja e tij, Ajola Xoxa, është lënë në masën e sigurimit “detyrim paraqitje”.
Sipas SPAK, hetimet paraprake kanë zbuluar se Veliaj dhe bashkëshortja e tij kanë krijuar një mekanizëm për të përfituar në mënyrë të paligjshme fonde publike që administron Bashkia Tiranë, me qëllim pasurimin personal të Veliajt dhe familjes së tij përmes veprimeve të kamufluara dhe të kundërligjshme.
