Protestat nuk kanë të ndalur, banorët e Astirit nuk e kanë ndërprerë as për një ditë rezistencën e tyre duke kërkuar me forcë dëmshpërblimin e banesave të tyre.
Megjithatë protesa e parë e këtij viti është shoqëruar me një incident ku një drejtues mjeti provoi të çante turrmën, mirëpo protestuesit thonë se ai nuk ishte banor i thjeshtë , por efektiv policie dhe bëri gjithçka për të provokuar.
Por kjo nuk nuk është gjithçka, mbrëmjen e djeshme banorët kanë kërcënuar se do ta përshkallëzojnë protestën duke e çuar atë deri në grevë.
“Do të ngremë një çadër këtu, do të bllokojmë të dyja anët e rrugës dhe do të futemi me gra, me fëmijë, me pleq, të gjithë në grevë urie”, ka thënë njëri nga banorët.
Mbështetje për këtë vendim, banorët kanë gjetur edhe nga Partia Demoktratike, ku Klevis Balliu ka folur në emër të saj.
“Çdo qyetar shqiptar është gati të sakrifikojë gjithçka që ti ktheje vendit legjitimitetin. Qytetarët e bashkuar do të arrijnë që të mposhtin regjimin diktatorial të Edi Ramës. Protesta do të vijojë deri në anulimin e projektit. Nuk ka opsion tjetër për qeverinë veçse të anulojë projektin. Çdo ditë rezistenca e tyre rritet po ashtu dhe kredibiliteti i tyre”, është shprehur Balliu.
Banorët njëzëri u shprehën se nuk do të tërhiqen nga protesta nëse nuk anulohet projekti i “Unazës së Madhe” që sipas tyre është korruptiv.
Banorët e Astirit kanë përpiluar 6 kërkesa, të cilat kërkojnë që qeveria t’i plotësojë me çdo kusht:
- -Anulimi i projektit të Unazës së Madhe;
- -Rifillimi i procesit të legalizimit për të gjitha banesat;
- -Rregullimi i kushteve të transportit publik në kryeqytet;
- -Ulja e çmimit të karburantit dhe rritja e cilësisë së tij;
- -Tu jepen punonjësve të policisë rroga e 13 orët suplementare dhe pagesa e dietave;
- -Plotësimi i kërkesave të studenteve dhe rrëzimi i ligjit të Arsimit të Lartë.
