Pas Parisit, janë futur në izolim 16 rajone të tjera franceze. Lajmi u bë i ditur nga kryeministri francez Jean Castex.
Masat do të jenë në fuqi për të paktën katër javë dhe do të jenë më pak strikte se ato të marsit dhe nëntorit vitin e kaluar.
Shkollat do të qëndrojnë të hapura dhe njerëzit do të lejohen të dalin në natyrë, për ecje, aktivitet fizik, pasi të kenë marrë leje dhe brenda një rreze prej 10 kilometrash nga shtëpia.
Dyqanet jo jetike, duke përfshirë libraritë dhe dyqanet muzikore do të mbyllen. Gjithashtu udhëtimet ndër-rajonale do të jenë të ndaluara.
Vendimi vjen pasi Franca regjistroi të enjten gati 35 mijë raste të reja me koronavirus dhe 268 viktima.
Castex tha se Franca po luftonte me valën e saj të tretë për shkak të varianteve të reja të virusit që kanë përshpejtuar transmetimin në të gjithë vendin.
Franca ishte gjithashtu një nga dhjetra vendet europiane që pezulluan shpërndarjen e vaksinës AstraZeneca. Vaksinimi do të rifillojë sot pasdite, ndërsa kryeministri deklaroi se edhe ai do të merrte këtë vaksinë.
“Vaksina AstraZeneca është efektive, siç nënvizohet nga rregullatori europian,” tha ai, duke iu referuar deklaratës së mëparshme të bërë nga Agjencia Europiane e Barnave (EMA).
Referuar vendeve të Europës, Greqia dhe Italia janë dy shtetet e tjera mjaft të prekura nga vala e tretë. Greqia prej javësh tashmë ndodhet nën masa të rrepta sigurie, ndërsa Italia po përballet me shifra rekord infektimesh dhe vdekjesh që kalojnë 400 persona në ditë.
Nga ana tjetër Brazili ndodhet në majë të listës së kuqe me shifra rekord si infektimesh ashtu edhe viktimash.
Në 24 orë ka pasur mbi 73 mijë të prekur dhe 2227 viktima, duke e çuar në gati 12 milionë numrin total të të prekurve dhe 292.752 atë të viktimave që nga fillimi i pandemisë.
Ndërsa Brazili përballet me një situatë të vështirë nga Covid-19, spitalet në qytetet më të mëdha të vendit janë të mbushur dhe sistemi shëndetësor po shkon drejt kolapsit.
