Ministri i Brendshëm, Sandër Lleshaj, ka qenë i ftuar sot në emisionin ‘Kapital’.
Ndër të tjera ai foli edhe për kërcënimin e Liderit Suprem të Iranit, Ali Kahmenei, ndaj vendit tonë.
Lleshaj pranoi se vendi ynë është tentuar të goditet nga një akt terrorist, i cili kishte në target iranianët opozitarë të MEK.
Mirëpo, fatmirësisht, kjo celulë është parandaluar në kohë.
Ndonëse ai nuk përmendi më shumë të dhëna, kuptohet se bëhet fjalë për celulën e 2018, ku u arrestuan tre iranianë që pretendonin se ishin gazetarë.
Së fundmi u zbulua se në krye të kësaj celule ka qenë Soleiman.
“Ka ekzistuar një celulë terroriste: Kjo ka qenë një tentative për të goditur përmes një akti terrorist në Shqipëri, që është parandaluar përmes angazhimit të autoriteteve tona dhe arritëm që në kohën e duhur të parandalojmë një goditje. Qëllimi ishte për të realizuar një goditje terroriste kundër qytetarëve iranianë që ndodhen në Shqipëri. Nuk po them për vendin, por targeti ishin këta persona, opzoita iraniane, qytetarët iranianë që ndodhen në Shqipëri. Shqipëria nuk i ka pranuar si opozitë politike, por si një grup që ndodhet në kushtet e rrezikut që kishin nevojë për ndihmë. Është fat i mirë që Shqipëria i ka pranuar”, tha Leshaj.
Ministri u shpreh se agjencitë inteligjente në Shqipëri janë të shqetësuara mbi aktivitetin e Iranit në vendin tonë.
“Agjencitë tona janë të shqetësuara lidhur me aktivitetin potencial të agjencive të Iranit në Shqipëri, janë në një vëmendje të shtuar sepse nuk përjashtohen mundësitë e interesave negativë iranianë në Shqipëri. Nuk kemi indicie të sakta për përpjekje operative, por kemi shtuar vëmendjen”, përfundoi ai
Lideri suprem i Iranit, Ali Khamenei, në një deklaratë për mediat vendase, teksa fliste për shuplakën që Irani i dha SHBA, foli edhe për vendin tonë.
Në fjalën e tij, ai përmendi Shqipërinë, pa i thënë emrin, por duke e konsideruar si një vend djallëzor që ka bërë komplot me SHBA-në.
