Katër muaj pa marrë rrogat, naftëtarët e Ballshit protestë para Prefekturës së Fierit

Google+ Pinterest LinkedIn Tumblr +

Naftëtarët e Ballshit protestuan sot përpara Prefekturës në Fier për rrogat e prapambetura.

Ata shprehen se kanë 4 muaj pa u paguar, ndërsa prej dy muajsh nuk u janë derdhur sigurimet shoqërore.

Gjithashtu naftëtarët u kanë bërë thirrje deputetëve, që të kthejnë sytë nga ta.

Prej 5 muajsh, uzina e përpunimit të naftës në Ballsh ka mbyllur dyert, duke lënë 800 punëtorë pa rroga.

Njëri prej protestuesve u shpreh, se kërkon paratë e tij, për kohën që ka punuar.

“Të na japin rrogat, pagat që janë të deklaruara. Nëse ai nuk do të punojë, të na japë shkresat për përkrahje sociale apo çfarë na takon me ligj”, u shpreh naftëtari.

Naftëtarët akuzojnë kompaninë për mashtrim, pasi u ka premtuar disa herë rrogat, por nuk u ka dhënë asnjë lek.

Prefekti i Fierit, Baki Bala, ka pritur një përfaqësi të naftëtarëve dhe u ka premtuar zgjidhjen e problemit të tyre.

Nëse nuk zgjidhet problemi, naftëtarët paralajmërojnë se do të nisen për marshim drejt Tiranës.

Rafineria e Ballshit e administruar nga “Tosk Energji” është mbyllur që në shtator.

Prej asaj kohe punëtorët kanë dalë në protestë për pagat e padhëna, por thirrjet e tyre kanë rënë në vesh të shurdhët.

“Bankers Petroleum” ia ka hedhur fajin “Tosk Energji”, duke sqaruar se kjo e fundit nuk ka respektuar kontratat, duke e detyruar që sasinë e naftës gjendje ta kalojë për eksport.

Shpërndaje
Share.

Komento