Një katastrofë mjedisore po ndodh në Vlorë. Më shumë se 1500 kg peshq dhe dhjetëra breshka janë raportuar të ngordhura në brigjet e liqenit të Bestrovës. Shërbimi veterinar në Vlorë dhe Inspektoriati i Peshkimit ka nisur hetimet lidhur me këtë dukuri.
Përveç erës së keqe, peshqit e ngordhur mund të bëhen edhe shkak i përhapjes së një epidemie. Bëhet me dije se janë marrë mostra nga uji dhe zona përreth për të zbuluar se cili është shkaku i kësaj ngordhjeje në masë.
Banorët e zonës shprehen se kjo dukuri ndodh për herë të parë. Deri më tani dy janë dyshimet kryesore lidhur me ngjarjen, njëra është mungesa e oksigjenit dhe tjetra aludohet një helmim nga dora e njeriut.
Liqeni i Bestrovës është ndërtuar mbi 60 vite më parë për vaditjen e tokave. Në kohën e komunizmit është gjuajtur peshk nga ndërmarrja e peshkimit të ujrave të ëmbël.
