Policia kufitare në aeroportin e Rinasit ka goditur një tentativë për kalim të paligjshëm të kufirit me dokumente të falsifikuara, duke vënë në pranga dy shtetas turq.
Të arrestuarit, të identifikuar si H.K., 29 vjeç dhe A.H., 21 vjeç, akuzohen për “falsifikim të letërnjoftimeve, pasaportave ose vizave”, “falsifikim dokumentesh” dhe “ndihmë për kalim të paligjshëm të kufirit”, të kryera në bashkëpunim.
Ngjarja ndodhi në dalje të territorit shqiptar, gjatë kontrolleve rutinë për fluturimin Tiranë–Luton.
Shtetasi H.K. paraqiti një pasaportë greke, për të cilën policia kufitare ngriti dyshime se ishte e falsifikuar. Të dy personat u dërguan menjëherë në vijë të dytë për kontroll më të imtësishëm.
Gjatë verifikimeve, në çantën e H.K. u gjetën edhe një kartë identiteti dhe një leje drejtimi greke, gjithashtu të dyshuara si të falsifikuara. Pasaporta greke e paraqitur në fillim u konfirmua gjithashtu si e falsifikuar.
Ndërkohë, në çantën e A.H. u gjet një pasaportë turke me të dhënat reale të H.K., e cila pas ekzaminimit rezultoi dokument origjinal. Megjithatë, në të njëjtin bagazh, policia zbuloi një pasaportë greke, një kartë identiteti dhe një leje drejtimi, të gjitha me të dhënat e një shtetasi tjetër, Y.Y., që rezultuan dokumente të falsifikuara.
Të dy personat u arrestuan në flagrancë, ndërsa materialet iu referuan Prokurorisë së Rrethit Gjyqësor Tiranë për veprime të mëtejshme hetimore. Autoritetet po vijojnë hetimet për të zbardhur rrjetin e mundshëm të falsifikimeve që mund të qëndrojë pas këtij rasti.
