Pas skandalit të mandarinave, Ervin Resuli, Presidenti i Urdhrit Veterinar, ka bërë një tjetër denoncim publik.
Gjatë një interviste në emisionin “Sot, live në Shqipëri”, ai zbuloi se një ngarkesë me speca nga Shqipëria ishte kapur në Kroaci me nivele të larta pesticidesh, përtej normave të lejuara nga BE.
Këtë shkelje e ka zbuluar sistemi europian i monitorimit të sigurisë ushqimore, RAFT.
Resuli kritikoi Ministrinë e Bujqësisë dhe Autoritetin Kombëtar të Ushqimit (AKU) për mungesën e transparencës dhe mosinformimin e konsumatorëve. “Nëse kontrollojmë faqet zyrtare të këtyre institucioneve, nuk ka asnjë njoftim se për cilën kompani bëhet fjalë apo se si mund të shmanget ky produkt nga tregu. Kjo është alarmante,” tha ai.
Sipas tij, Ministria e Bujqësisë nuk ka reaguar jo për të shmangur panikun, por sepse është në fushatë elektorale. Ai vuri në dukje se, falë medias, u bë i mundur edhe denoncimi i skandalit të mishit me salmonelë disa ditë më parë, duke parandaluar një rrezik të madh për shëndetin publik.
Ndërkohë, ekspertët paralajmërojnë se pesticidet mbi normën e lejuar mund të kenë pasoja të rënda për shëndetin, duke shkaktuar efekte kancerogjene, çrregullime të sistemit imunitar, probleme me fertilitetin dhe dëmtime në sistemin nervor.
Ky rast është vetëm një hallkë në një zinxhir skandalesh ushqimore në Shqipëri. Skandali i mandarinave të helmuara zbuloi një rrjet korrupsioni, ku drejtori i AKU Berat, Fatlli Adilaj, gënjeu publikun duke pretenduar se produktet e ndotura ishin asgjësuar, ndërkohë që ato u hodhën në treg. Për këtë çështje u arrestuan edhe fermeri Elton Tafa, grumbulluesi Arben Dyli dhe inspektori Elson Tahiraj.
Gjithashtu, skandale të tjera kanë përfshirë:
• Coca-Cola, që zhduku 1.8 milion litra pije të skaduara pa mbikëqyrje, duke shkelur rregullat e sigurisë ushqimore.
• KFC, ku AKU zbuloi salmonelë në mishin e pulës, por nga 1,535 kg produkt i ndotur, vetëm 177 kg u gjetën dhe asgjësuan.
• Skandali i akulloreve, ku 13.2 ton produkte të kontaminuara me oksid etileni, një substancë kancerogjene, u hodhën në treg.
• Produktet e kompanisë “Lufra”, ku qumështi dhe dhalla e prishur u shpërndanë në dyqane.
• Mielli “Diamond”, ku minjtë u filmuan mbi thasët e magazinuar, ndërsa AKU qëndroi në heshtje.
Në mes të këtyre skandaleve, mungesa e reagimit nga institucionet përgjegjëse ka shtuar shqetësimin e qytetarëve mbi sigurinë ushqimore dhe nevojën për transparencë të plotë nga autoritetet.