Kryetarja e Kuvendit, Lindita Nikolla ka reaguar sot pas situatës së tensionuar në Komisionin e Medias, mes deputetëve të opozitës, Bardhi dhe Noka kundrejt deputetes Flutura Açka.
Nikolla ka dënuar këtë ngjarje aspak të këndshme dhe ka theksuar se dy deputetët ushtruan dhunë ndaj një gruaje.
Më tej ajo thekson se ky sulm i paprecedentë ndaj një zonje deputete të Kuvendit të Shqipërisë, është shumë më tepër se shkelje e Rregullores së Kuvendit dhe e etikës së sjelljes së deputetit.
Kujtojmë se Bardhi së bashku ne Nokën iu afruan afër Açkës, teksa kjo e fundit drejtonte mbledhjen dhe i shkulën mikrofonin për të mos e lënë që të vazhdonte mbledhjen.
Reagimi i Nikollës:
Dënoj ashpërsisht ngjarjen shumë të rëndë që ndodhi sot në Komisionin e Medias të Kuvendit të Shqipërisë. Deputetët Gazment Bardhi dhe Flamur Noka, jo vetëm penguan me dhunë zhvillimin e mbledhjes së Komisionit, por fyen rëndë Kryetaren e Komisionit, deputeten e nderuar Flutura Açka.
Ky sulm i paprecendent ndaj një zonje deputete të Kuvendit të Shqipërisë, është shumë më tepër se shkelje e Rregullores së Kuvendit dhe e etikës së sjelljes së deputetit.
Në një kohë kur Kuvendi është duke punuar për ashpërsimin e legjislacionit kundër dhunës ndaj grave, në mjediset e tij, në një sallë mbledhjesh ku duhet të zhvillohet debat për ligjet dhe prej nga duhet të rrezatohet edukatë dhe qytetari, në sy të kolegëve, medias dhe gjithë qytetarëve, dy deputetë ushtrojnë dhunë ndaj një kolegeje të tyre, deputete dhe Kryetare Komisioni. Dhuna e ushtruar prej deputetëve Bardhi dhe Noka i kaloi caqet e dhunës verbale, dhe për këtë flasin pamjet e transmetuara nga media.
