Policia e Lezhës ka shpallur në kërkim dy persona, të dyshuar për një ngjarje të ndodhur mbrëmjen e 4 majit 2025 në fshatin Dajç.
Të dyshuarit, Xh. S., 27 vjeç, dhe I. Gj., 40 vjeç, akuzohen për ndjekje dhe kanosje me armë ndaj shtetasve E. N. dhe D. N., vëllezër të kandidates për deputete të Partisë Socialiste, K. N.
Sipas kallëzimit të bërë, dy automjete u përfshinë në incident, ndërsa viktimat pretenduan se sulmi kishte motiv politik, i lidhur me fushatën zgjedhore të motrës së tyre.
Menjëherë pas denoncimit, Policia nisi hetimet dhe ka identifikuar dy autorët e mundshëm, të cilët aktualisht janë në kërkim.
Njoftimi i policisë:
Drejtoria Vendore e Policisë Lezhë
-Specialistët për Hetimin e Krimeve të Komisariatit të Policisë Lezhë referuan materialet në Prokurori dhe shpallën në kërkim shtetasit Xh. S., 27 vjeç dhe I. Gj., 40 vjeç, si autorë të dyshuar për veprat penale “Kanosja apo dhunimi i pjesëmarrësve në zgjedhje” dhe “Mbajtja pa leje dhe prodhimi i armëve, armëve shpërthyese dhe i municionit” .
Shpallja në kërkim e tyre u bë pasi rreth orës 23:25 të datës 04.05.2025, shtetasit E. N. dhe D. N. njoftuan Sallën Operative të Policisë së Lezhës, se fillimisht automjeti me të cilin lëviznin, ishte ndjekur nga 2 automjete të tjera, dhe më pas në fshatin Dajç, ishin kanosur me armë, nga shtetasit që udhëtonin me dy automjetet, për pretendime që lidhen me fushatën elektorale të motrës së tyre, kandidates për deputete të qarkut Lezhë, shtetases K. N.
Menjëherë pas njoftimit, shërbimet e Policisë nisën hetimet, me qëllim zbardhjen e autorësisë dhe rrethanave të rastit. Nga veprimet hetimore të deritanishme dyshohet se autorë të kanosjes janë shtetasit Xh. S., 27 vjeç dhe I. Gj., 40 vjeç. Shërbimet e Policisë vijojnë intensivisht punën për kapjen e tyre. Gjithashtu, në drejtimin e Prokurorisë së Lezhës, po kryhen hetime për të zbardhur dhe dokumentuar me prova ligjore të gjitha rrethanat e këtij rasti.
