Kandidati i Partisë Demokratike për qarkun e Tiranës, Belind Këlliçi ka treguar në një intervistë për emisionin “Frontline” se deputetë të PS marrin në telefon qytetarët dhe i kërkojnë votën. Këlliçi ka thënë se ai vetë nuk përdor mënyrë të tillë, por shkruan letër që ua lë qytetarëve ted era.
“Unë nuk e kam marrë një mesazh të tillë, por aty nuk shoh asnjë lloj intimidimi. Nga PD marrin për të bërë sondazh dhe kjo është tjetër gjë. Ndërsa banorët më thonë se vetë deputeti Eduard Shalsi i ka telefonuar, duke iu kërkuar të votojnë për PS. Kjo është një formë e gabuar, është intimidim, se po të merr dikush i veshur me petkun e qeveritarit. Unë personalisht kam gjetur një formë tjetër, kam shkruar një letër për t’iu drejtuar qytetarëve. Psh. në Kombinat, si zona më e varfër, pasi jam njohur me problematikat, iu jam drejtuar qytetarëve me një letër, ku ju tregoj planin tim dhe të PD, dhe ua lë te dera. Nëse kanë kohë ta lexojnë, e bëjnë, ndryshe jo. Pra lihet qytetari i lirë”, tha Këlliçi.
Më tej kandidati i PD ka treguar se nuk kishte aplikuar kurrë në e-Albania dhe e hapi kur ishte në karantinë, por numri i tij i kartës rezultonte në përdorim. Sipas Këlliçi kjo bëhet për të marrë të dhënat dhe është një model që bazohet mbi propagandën e jo mbi punën.
“Unë nuk kisha aplikuar kurrë në e-Albania dhe kur e hapa në karantinë, më rezultonte se numri im i kartës ishte në përdorim. E gjitha kjo bëhet për të marrë të dhënat.
Mua do më krijonte shqetësim të shihja emrin tim dhe të shihja që kam një patronazhist, pa dhënë unë të drejtën që të kem një marrëdhënie të caktuar me një person të caktuar, që mbase edhe nuk e njoh. Kjo do më krijonte shqetësimin e “Big Brother”, që është dikush mbi ty e po të monitoron. Për herë të parë, në historinë e vendit tonë qeveria mban mbledhje se sa like kanë marrë ministrat, sa share, sa komente. Është një model që bazohet mbi propagandën, fasadën, dhe që i jep më shumë vëmendje likeve e shareve në rrjetet sociale, se sa punëve”, tha kandidati i PD.
