Ata që Basha nuk i promovoi, morën më pak vota kundër nga anëtarësia e PD-së gjatë votimeve për listën e kandidatëve. Në listat e Tiranës, bëhet fjalë për Tomor Alizotin, kreun e FRPD-së, Belind Këlliçi apo Grida Dumën. Belindi dhe Alizoti kanë marrë vetëm 10 vota kundër, krahasuar me kandidatë të tjerë.
Në dy Qarqet Tiranë e Durrës, më të mëdhenjtë e vendit, edhe pse nuk ka patur të përjashtuar ka patur një numër të lartë anëtarësh të pakënaqur me punën e ish-deputetëve e ish kryebashkiakëve.
Ish-deputetët e dalë nga listat e Lulzim Bashës në 2017, ishin më të kontestuarit, ndërkohë që numër të lartë votash kundër pati edhe për ish-kryebashkiakun e Kamzës, Xhelal Mziun. Këtë të fundit e shpëtoi formula e përllogaritjes të skualifikimit, me 20% të votave kundër të të gjithë anëtarësisë së thirrur për votim dhe jo vetëm të atyre që janë shprehur me votë.
Sipas burimeve në PD, sikur 20 përqindeshi të përllogaritej në raport me numrin e votave, shumë emra të rëndësishëm në PD do të humbisnin garën për kandidat. Pakënaqësinë ndaj demokratëve, anëtarësia e shprehu edhe nëpërmjet pjesëmarrjes së ulët në votime në disa degë..
Qarku i parë që votoi ishte ai i Kukësit, ku anëtarësia përjashtoi Ish-kryetarin e Bashkisë së Kukësit, Bashkim Shehu. Ky i fundit pretendoi se baza nuk ishte e mirëinformuar për mënyrën e votimit kundër. Edhe demokratët e Tropojës përjashtuan nga gara ish- kryebashkiakun, Besnik Dushaj.
Një tjetër goditje e fortë Partisë Demokratike i erdhi në Qarkun e Korçës ku i vetmi ish-deputet, i konfirmuar ishte Ervin Salianji. Në Devoll, anëtarësia skualifikoi nga gara Hekuran Hoxhollin, ndërsa në Pogradec Klevis Balliun. Por në Pogradec anëtarësia nuk ishte e pakënaqur vetëm me përfaqësimin në parlamentin e kaluar. Edhe për drejtimin e së djathtës në pushtetin vendor, anëtarësia shfaqi pakënaqësi, pasi skualifikoi nga gara ish kryebashkiakun Eduard Kapri.
Ish- deputeti i PD për Beratin, Astrit Veliaj është skualifikuar me një numër të lartë votash kundër. Por ai hodhi akuza të forta për procesin e përzgjedhjes së kandidatëve, duke thënë se po kandidojnë persona me rekorde kriminale.
Megjithatë do të jetë Komisioni i Vlerësimit të Kandidaturave që do të bëjë brenda 5 ditëve sërish një kalkulim të listës me rreth 350 emra të dalë nga votimet e anëtarësisë. Më pas Kryesia që do të vulosë listën finale.
/GazetaReforma.com/
