Kalaja efektivëve të policisë: Mos guxoni sot të arrestoni protestuesit!

Adriana Kalaja nga Aleanca për Mbrojtjen e Teatrit, në fund të protestës së sotme përpara bashkisë së Tiranës, bëri një thirrje për të vazhduar protestën edhe të premten e ardhshme. “Ne do të vijmë këtu edhe të premten tjetër, do të jemi edhe më fuqishëm, edhe më shumë dhe nuk e kemi problem,” u shpreh Kalaja.

Ajo gjithashtu u drejtua Policisë së Tiranës, duke paralajmëruar se qëndresa e qytetarëve nuk mund të frenohet me masa represive. “Policia e Shtetit e pa shumë mirë që nëse do populli nuk ka zinxhirë dhe hekura që e mban. Ju siguroj që çdo lëndë, çdo fishekzjarr, çdo mollë e hedhur tek bashkia, nuk është hedhur ndaj jush, por si reagim ndaj korrupsionit, vjedhjes, ndaj abuzimit me të drejtat tona,” tha Kalaja.

Kalaja i bëri thirrje Policisë të respektojë të drejtat e protestuesve dhe të mos ndërhyjë në mënyrë të padrejtë pas protestës. “I bëj thirrje Policisë, çojeni deri në fund misionin tuaj dhe mos guxoni që pas protestës të vërshoni në shtëpitë e protestuesve për t’i ndaluar dhe arrestuar,” shtoi ajo, duke theksuar se gjykatat kanë liruar protestuesit në të kaluarën, duke vërtetuar mbrojtjen që ligji u ofron. “Ju bëj thirrje të gjithëve që të vini edhe të premten tjetër,” përfundoi Kalaja.