Në mbledhjen e kryesisë së thirrur sot nga Sali Berisha, të strukturave paralele në Partinë Demokratike, ishte e pranishme dhe ish-kryeparlamentarja Jozefina Topalli.
E pyetur nëse Sali Berisha duhet të japë dorëheqjen, Topalli u shpreh se ai duhet të largohet nëse humb në zgjedhjet parlamentare dhe jo lokale.
Jozefina Topalli u shpreh përpara mbledhjes së Kryesisë se opozita nuk mund të bëhet me modelin e ish-kryetarit.
“E para këto nuk ishin zgjedhje. E dyta pushteti nuk do të ndalet dhe e treta opozita nuk bëhet me modelin e ish-kryetarit” tha ajo. A duhet të ketë dorëheqje? “Në zgjedhjet politike po” deklaroi Topalli.
Kujtojmë se Berisha gjatë fjalës së tij para kryesisë deklaroi se ka dyshime të forta që është ndërhyrë në pajisjet elektronike gjate zgjedhjeve të 14 majit.
Sipas tij pajisjet nuk ishin të sigurta. Berisha tha se Partia Demokratike pret që të identifikojë dyshimet duke ndjekur deri në fund rrugën ligjore.
“Ne nuk mund të çedojmë para kësaj situate. Jo! Po marr zonat e votimit elektronik. Është opozita ajo që duhet të jetë e interesuar për votimin elektronik, por faktet e shumta janë mbledhur dhe po mblidhen. Një informacion që kemi është 100% i sigurt. janë përdorur si militantë të PS operatorët që rrinin për të ndihmuar dhe asistuar zgjedhësit. Ata funksionuan si pjesë e aparatit të partisë Socialiste. Ka qendër në të cilën një operator në kundërshtim me të gjitha ligjet mund të ketë sheqeruar dhjetëra herë ata që votonin. Ka qendra ku është përdorur shoqërimi si rrugë kryesore për të diktuar votimin dhe jo pak. Këto janë të dokumentuara, por ka dyshime të forta se është ndërhyrë në algoritmin e makinerive”, u shpreh Berisha.
