Presidenti Joe Biden fali djalin e tij, Hunter Biden, të dielën mbrëma, duke shmangur një dënim të mundshëm për të, në një veprim që bie në kundërshtim me premtimet e tij të kaluara për të mos përdorur kompetencat e presidencës për të ndihmuar anëtarët e familjes së tij.
Hunter Biden ishte shpallur fajtor për akuzat federale lidhur me posedimin e paligjshëm të një arme zjarri dhe për moskryerjen e detyrimeve fiskale.
Në të kaluarën, Presidenti Biden kishte theksuar se nuk do ta fali djalin e tij dhe do të lejonte që dënimi të ekzekutohej.
Vendimi i tij ka ndodhur pak javë përpara se Hunter Biden të dënohej për akuzat lidhur me armën dhe taksat, dhe më pak se dy muaj përpara se Donald Trump të rikthehej në Shtëpinë e Bardhë.
Falja e dhënë nga Biden i jep fund një periudhe të gjatë hetimesh për Hunter Biden, i cili kishte bërë publike hetimin federal që kishte nisur në dhjetor 2020, pas fitores së babait të tij.
Biden, i cili vazhdimisht ishte zotuar para amerikanëve se do të rivendoste normat dhe respektin për sundimin e ligjit pas mandatit të parë të Trump, përfundimisht e përdori pozicionin e tij për të ndihmuar djalin e tij, duke shkelur premtimin e tij publik ndaj amerikanëve se nuk do ta bënte një gjë të tillë.
Deri më 8 nëntor, disa ditë pas fitores së zotit Trump, Sekretarja e Shtypit e Shtëpisë së Bardhë, Karine Jean-Pierre, përjashtoi mundësinë e një faljeje për të riun Biden, duke thënë:
“Na është bërë kjo pyetje shumë herë. Përgjigja jonë vazhdon të jetë jo.”
Në një deklaratë të dhënë të dielën në mbrëmje, Biden tha:
“Sot, nënshkrova një falje për djalin tim Hunter”, duke shtuar se ndjekja penale e djalit të tij ishte e motivuar politikisht dhe ishte një “shkelje e drejtësisë”.
“Akuzat në rastet e tij erdhën vetëm pasi disa nga kundërshtarët e mi politikë në Kongres i nxitën ata të më sulmonin dhe të sfidonin zgjedhjen time,” tha zoti Biden.
“Asnjë person i arsyeshëm që shikon faktet në çështjet e Hunterit nuk mund të arrijë në ndonjë përfundim tjetër përveç se Hunter u vu në shënjestër vetëm sepse ai është djali im.”
“Shpresoj se amerikanët do ta kuptojnë pse një baba dhe një president do të merrte këtë vendim”, shtoi Presidenti Biden, duke thënë se e mori vendimin këtë fundjavë.
Në qershor, Hunter Biden u shpall fajtor në gjykatën federale të Delauerës për tre akuza që lidhen me blerjen e një arme në vitin 2018.
Prokurorët thanë se ai kishte gënjyer në formularin federal, duke pretenduar se nuk përdorte në mënyrë të paligjshme drogë ose se nuk kishte varësi prej saj.
Ai pritej të niste gjyqin në shtator për një rast të lidhur me taksat në Kaliforni, ku akuzohej se nuk kishte paguar më shumë se 1.4 milionë dollarë taksa. Megjithatë, ai pranoi të deklarohej fajtor në mënyrë të papritur, disa orë pas fillimit të përzgjedhjes së jurisë.
Hunter Biden shpjegoi se ky pranim fajësie kishte për qëllim shmangien e mundësive për komplikime dhe shqetësime të mëtejshme për familjen e tij, pasi procesi gjyqësor për armëmbajtjen kishte nxjerrë në pah detaje mbi luftën e tij me varësinë nga kokaina.
Akuzat për taksat mund të sillnin deri në 17 vjet burg, ndërsa për posedimin e armës në mënyrë të paligjshme mund të kërkohej deri në 25 vjet.
Falja e dhënë përfshin jo vetëm këto vepra penale, por edhe çdo krim tjetër që mund të ketë kryer Hunter Biden gjatë periudhës nga 1 janari 2014 deri më 1 dhjetor 2024.
“E kam pranuar dhe kam marrë përgjegjësinë për gabimet e mia gjatë ditëve më të errëta të varësisë sime – gabime që janë shfrytëzuar për të më poshtëruar dhe turpëruar publikisht mua dhe familjen time për spektakël politik”, tha Biden.
Presidenti Biden nuk është i pari që përdor kompetencat e tij të faljes për të ndihmuar të afërmit.
Në fund të mandatit të tij, Presidenti Trump fali Charles Kushner, babanë e dhëndrit të tij, Jared Kushner, dhe shumë aleatë të tij që ishin shpallur fajtorë në hetimin e Prokurorit të Posaçëm Robert Mueller.
