Gjykata Kushtetuese ka urdhëruar Gjykatën Administrative të Apelit që, brenda një afati prej gjashtë muajsh, të shqyrtojë dhe të japë vendim për çështjen e ngritur nga Dëshmitarët e Jehovait, të cilët janë në pritje të gjykimit që prej 31 majit 2022.
Sipas dokumenteve, Dëshmitarët e Jehovait pretendojnë se në fillim të vitit 2021 i kanë dërguar një kërkesë Këshillit të Ministrave, përmes postës, për të nisur procedurat për njohjen si bashkësi fetare nga Komiteti i Kulteve.
Në mungesë të një përgjigjeje zyrtare, ata i janë drejtuar gjykatës në qershor të po atij viti, duke kërkuar që shteti të detyrohet të japë një përgjigje dhe t’i regjistrojë si bashkësi fetare.
Gjykata Administrative e Shkallës së Parë, në fund të vitit 2021, rrëzoi kërkesën për detyrimin e kthimit të përgjigjes, me arsyetimin se nuk ekzistonte një kërkesë e protokolluar. Për kërkesën lidhur me regjistrimin si komunitet fetar, gjykata deklaroi se padia nuk ishte legjitime ndaj institucionit në fjalë dhe, për rrjedhojë, e pushoi çështjen.
Pas kësaj, paditësit iu drejtuan Gjykatës së Lartë, duke theksuar se po shkelej afati për një gjykim të arsyeshëm një problem që, sipas tyre, prek edhe qindra qytetarë të tjerë që presin vendime për vite me radhë.
Gjykata e Lartë theksoi ngarkesën ekstreme të gjyqtarëve, duke përmendur se vetëm gjyqtarja relatore kishte nën shqyrtim 2450 çështje, dhe deklaroi se përshpejtimi i gjykimeve do të rëndonte më tej situatën e kolapsuar të gjykatës së Apelit.
Megjithatë, Gjykata Kushtetuese ka vlerësuar se vonesat e zgjatura përbëjnë shkelje të të drejtës për një gjykim brenda një afati të arsyeshëm një situatë që është përkeqësuar edhe nga implementimi i reformës në drejtësi. Ajo ka theksuar se ligjvënësi duhet të garantojë funksionimin normal të gjykatave në të gjitha nivelet.
Rasti i Dëshmitarëve të Jehovait është një nga shembujt ku zvarritjet proceduriale kanë çuar në cënimin e të drejtave, një problem që është konstatuar nga Kushtetuesja edhe në shumë raste të tjera, sidomos në paditë për largime të padrejta nga puna.
