Punonjësit e një fasonerie në Fier janë ngritur në protestë për pagat e luftës.
Ata bëjnë fajtor administratorin e kompanisë dhe ekonomistët që nuk kanë bërë aplikimin tek tatimet.
“ Kompania e madhe është në Berat, ka hapur një filial në Fier, prodhon canta kartoni. Kemi punuar deri më 12 mars, pastaj puna u mbyll. Kemi vajtur te tatimet për paketën e dytë, na kanë thënë që ju kanë larguar në datën 7. Jemi rreth 35 punëtor. E dyta është aplikimi që ekonomistët nuk po na bëjnë, se ne nuk dalim në sistem nëse nuk ai nuk na regjistron. Kryeministri Edi Rama ka thënë për paketën e dytë 400 mijë punëtorët që kanë humbur punën për shkak të kësaj situate e përfitojnë. Ne na thonë zyrat e ndërmarrje, se vetëm me atë kemi lidhje, ne nuk dimë kush është pronari, kush është administratori dhe ekonomisti, vijnë përgjegjësit në mëngjes dhe ikin nga puna, kaq. Thonë që keni 4 muaj punë nuk e përfitoni, 4 muaj punë është e paketës së parë që kërkon 12 muaj punë për të përfituar asistencës, po të paktën 400 duhet ta përfitojmë”, tha një prej punonjësve për “Report Tv”.
Punëtoret shprehen se nuk do ta lënë me kaq, ndërsa kanë bërë me dije se do të shkojnë deri në instancat më të larta.
“Do shkojmë lart e më lartë, të mos kujtoj askush që do e lëmë me kaq. Janë tallur me ne se i kemi ‘pronto’ për çdo gjë. Nëse ato janë tallur me ne, do të tallemi edhe më shumë me ata, se fundja- fundit ato janë një hiç para nesh“, u shpreh një punëtore tjetër.
Në mesin e protestuesve është edhe një grua, e cila punën ka të vetmin burim të ardhurash për të ushqyer 5 fëmijët.
“S’kam asnjë të ardhur, kam 5 fëmijë më këtë rrogë po ushqehesha, nuk kam nga të vete, prandaj kam dalë këtu që të paktën të marrë pagën e luftës. Po mundohemi që të gjejmë një punë tjetër, po s’po mundemi dot“, shprehet ajo.
Kryeministri Edi Rama ndërkohë ka deklaruar se pagën e luftës do ta përfitojnë të gjithë ata që kanë humbur punën për shkak të COVID-19.
Për rastin në fjalë, fasoneria është mbyllur me vendim të vetë pronarëve, të cilët duhet të përmbushin detyrimet ndaj punonjësve.
Problemet me fasoneritë janë hasur në të gjithë vendin, në Durrës, Korçë, Përmet, ku punëtorët kanë mbetur pa asnjë të ardhur.
