Detaje të reja janë bërë të ditura nga shoqërimi i kontrollorëve të Albcontrol ne polici pas grevës së djeshme. Avokati i tyre, Rezart Kthupi ka thënë se mbrëmjen e djeshme janë shoqëruar në polici 24 prej tyre në orën 12 të natës. Një pjesë janë marrë nga hoteli pranë Albcontrol ku ndodheshin dhe disa janë paraqitur në mënyrë vullnetare pas thirrjes telefonike. Katër prej tyre kanë dalë nga policia dhe ndaj tyre nuk janë ngritur akuza.
“Janë shoqëruar rreth 24 kontrollorë. Janë shoqëruar mbrëmë në 12:00 të natës. Një pjesë e të shoqëruarve janë marrë nga hoteli pranë Albcontrol ku ndodheshin dhe të tjerë që janë thirrur në mënyrë telefonike dhe janë paraqitur në mënyrë vullnetare. Nga këta 24, 4 sapo kanë dalë nga policia. Sipas atyre që kanë dalë, kontrollorët janë marrë në pyetje. Kanë dhënë shpjegim për situatën. Për këta të katërt që kanë dalë, nuk ka akuza të ngritura.”, tha avokati.
60 kontrollorë të aeroportit të Rinasit nisën grevën pas pushimit të pesë kolegëve të tyre nga puna dhe reduktimit të pagave të tyre me 70% prej një viti. Godina e Albcontrol u mor nën kontroll ditën e djeshme nga Forcat e Armatosura, ndërsa në orët e vona të natës filloi edhe shoqërimi i kontrollorëve.
