Ditën e djeshme kryeministri Edi Rama prezantoi paketën e dytë ekonomike për përballimin e situatës së koronavirusit, duke vendosur të lehtësojë apo të shtyjë pagesën e kësteve të tatim-fitimit, pra atë këst që duke filluar nga muaji prill të çdo viti, të gjitha ndërmarrjet duhet ta derdhin në arkën e Tatimeve në formë parapagimi të tatim-fitimit, që do të përllogaritet në fund të vitit.
Ditën e sotme, Shqiptarja.com ka siguruar Aktin Normativ për tatimpaguesit e vegjël, me qarkullim deri në 14 milionë lekë në vit.
Sipas këtij drafti, qeveria ka vendosur që këstet e parapagimeve të tatim-fitimit të vitit 2020 të mos paguhen deri më 31 dhjetor dhe në këtë mënyrë subjekteve u krijohet një avantazh financiar, pasi ato ndodhen në kushtet e pakësimit të xhiros dhe fitimeve, ndërkohë që edhe arka e shtetit nuk mbetet bosh.
Ndërsa biznesi i madh, me qarkullim mbi 14 milionë lekë, nuk do parapaguajë këstet e tatimit mbi fitimin për tremujorin e dytë dhe të tretë, prill-qershor dhe korrik-shtator 2020, por do të rifillojnë nga tetori 2020.
Këstet e tatimit mbi fitimin për subjektet që operojnë në fushën e turizmit, fasonet dhe ato call center, që janë sektorët më të prekur nga kriza, nuk do të parapaguhen fare deri në dhjetor 2020.
Sakaq, nga ky favorizim përjashtohen vetëm bankat, kompanitë e telekomunikacioneve, ato të tregtimit të produkteve farmaceutike dhe kompani që tregtojnë produkte ushqimore, pasi supozohet se ata nuk do të kenë rënie në të ardhurat për shkak të Covid-19.
