Një situatë alarmante po përshkallëzohet në Izrael, ku zjarre të fuqishme kanë përfshirë pyje dhe zona të banuara pranë Jeruzalemit, duke detyruar autoritetet të shpallin gjendjen e jashtëzakonshme në shkallë kombëtare.
Emergjenca u shpall të mërkurën nga kryeministri Benjamin Netanyahu, pasi flakët shpërthyen në afërsi të autostradës që lidh Tel Avivin me Jeruzalemin.
Për shkak të rrezikut të lartë, mijëra banorë janë evakuuar dhe një segment kyç i rrugës është mbyllur plotësisht.
Sipas të dhënave paraprake, mbi 5000 hektarë tokë janë shkrumbuar nga zjarret, përfshirë rreth 3000 hektarë sipërfaqe pyjore.
Të paktën 23 persona, përfshirë fëmijë, janë trajtuar për probleme me frymëmarrjen dhe djegie, ndërsa 21 zjarrfikës kanë mbetur të plagosur gjatë ndërhyrjeve.
Për të përballuar situatën, Izraeli ka marrë ndihmë ndërkombëtare, me avionë zjarrfikës që kanë mbërritur nga vende si Greqia, Italia, Kroacia, Franca, Spanja, Ukraina, Qiproja dhe Britania.
Komandanti i forcave zjarrfikëse në Jeruzalem e cilësoi këtë si “zjarrin më të madh që ka përjetuar ndonjëherë vendi”, duke paralajmëruar se përballja me flakët do të zgjasë.
Temperaturat e larta dhe erërat e forta kanë përkeqësuar më tej situatën, duke detyruar anulimin e aktiviteteve për Ditën e Pavarësisë së Izraelit.
Autoritetet nuk përjashtojnë mundësinë e zjarrvënieve të qëllimshme, me kryeministrin që foli për 18 arrestime të dyshuara, ndërsa policia konfirmoi zyrtarisht ndalimin e 3 personave.
Gjendja mbetet tejet kritike, ndërsa pritet që flakët të përhapen më tej nëse moti nuk ndryshon në favor të ndërhyrjeve.
