Ushtria izraelite ka filluar sërish sulmet ajrore në Gaza pas përplasjeve të fundit midis ushtarëve të saj dhe protestuesve palestinezë gjatë një demonstrate për të përkujtuar djegien e Xhamisë Al-Aksa të Jeruzalemit, 52 vjet më parë.
Në një deklaratë zyrtare që mbajtën të shtunën në orët e vona, ushtria izraelite tha se goditi katër vende të prodhimit dhe magazinimit të armëve në Gaza që i përkisnin Hamasit. Bastisjet erdhën disa orë pasi ushtarët izraelitë hapën zjarr mbi turmat e palestinezëve të rinj që protestonin në gardhin që ndante Gazën me Izraelin.
Gjithashtu Ministria palestineze e shëndetësisë tha se dhjetëra njerëz u plagosën, përfshirë një djalë 13-vjeçar palestinez i cili u qëllua në kokë. “Dyzet e një civilë u plagosën me lëndime të ndryshme,” tha ministria në një deklaratë. Ushtria izraelite i quajti protestuesit “trazirë” dhe tha se disa ishin përpjekur të ngjiteshin në gardhin kufitar dhe hodhën “pajisje shpërthyese” kundër ushtarëve të saj.Ushtria tha se “u përgjigj me mjete për shpërndarjen e trazirave, përfshirë kur ishte e nevojshme zjarr i drejtpërdrejtë”.
Ndërsa policia kufitare izraelite ka treguar se një 21-vjeçar është plagosur rëndë, pasi sipas tyre është qëlluar nga një protestues palestinez. Gjithashtu mësohet se i riu është në gjendje kritike. Sipas Al Jazeera, të paktën 10 nga palestinezët e plagosur janë fëmijë dhe dy prej tyre ishin në gjendje kritike. Al Jazeera raporton se palestinezët kishin kërkuar një përkujtim paqësorë.
