Ushtria izraelite ka zbardhur detaje të reja mbi valën më të fundit të sulmeve ajrore në Iranin jugperëndimor, duke konfirmuar se rreth 30 avionë luftarakë goditën më shumë se 50 objektiva ushtarake në zonën e Ahvazit.
Mes objektivave ishin depo raketash, sisteme zbulimi radarik dhe infrastrukturë ushtarake që sipas Izraelit, përbënin kërcënim të drejtpërdrejtë ndaj sigurisë së tij.
Sipas ushtrisë izraelite, një nga objektivat kryesorë ishte një vend ku ruheshin lëshues raketash që më parë kishin shënjestruar territorin izraelit.
Ndërkohë, media iraniane ka konfirmuar vdekjen e një tjetër shkencëtari bërthamor si pasojë e sulmeve. Isar Tabatabei Ghomsheh, diplomuar në Universitetin Sharif të Teheranit, është vrarë në shtëpinë e tij së bashku me bashkëshorten, sipas buletinit të universitetit.
Vdekja e tij e çon në dhjetë numrin e shkencëtarëve bërthamorë të vrarë brenda pak ditësh.
Mes viktimave janë emra të njohur në fushën e programit bërthamor iranian, si Fereydoon Abbasi, ish-drejtues i Organizatës së Energjisë Atomike të Iranit – dhe Mohammad Mehdi Tehranchi, president i Universitetit Islamik Azad në Teheran.
Në total, autoritetet iraniane konfirmojnë 430 të vdekur dhe rreth 3,500 të plagosur që nga nisja e sulmeve më 13 qershor. Bilanci mbetet i përkohshëm ndërsa përplasja mes dy shteteve vazhdon pa shenja zbutjeje.
Nga ana tjetër, Irani po i përgjigjet me sulme balistike dhe raketa supersonike, duke goditur zona urbane izraelite dhe duke testuar kapacitetet e sistemit mbrojtës “Kupola e Hekurt”. Edhe pse viktima janë regjistruar edhe në Izrael, autoritetet nuk kanë dhënë një numër të saktë.
Tensionet janë shtuar më tej edhe me përfshirjen indirekte të Shteteve të Bashkuara. Sipas Fox News, avionë bombardues amerikanë të tipit B-2 janë parë në lëvizje drejt bregut perëndimor të SHBA-ve.
Bombarduesit, të cilët janë të aftë të kryejnë misione me rreze të gjatë dhe të transportojnë bomba speciale për depërtim në objekte nëndheshme si impianti bërthamor i Fordo-së në Iran, janë furnizuar me karburant në fluturim, një sinjal që SHBA-të mund të përgatiten për një ndërhyrje të mundshme ushtarake.
Ndërkohë, presidenti Donald Trump deklaroi se do të marrë një vendim mbi një sulm të mundshëm ndaj Iranit “brenda dy javëve të ardhshme”, por lëvizjet e fundit sugjerojnë se ai mund të veprojë edhe më herët.
