Gjatë vizitës zyrtare në Ukrainë, një vëmendje të veçantë mori veshja e ministres, Elisa Spiropali.
Ministrja e Shtetit për Marrëdhëniet me Kuvendin, e ka ndryshuar 3 herë veshjen e saj dhe në të tria është shfaqur me kostume, por me ngjyra të ndryshme.
Shumë e konsideruan si pasarelë, që ministerja Spiropali bëri në Ukrainë, vend i cili po vuan plagët e luftës prej pothujse 4 muaj.
Ndërkohë në një intervistë për “News 24”, ministrja Elisa Spiropali u ka kthyer përgjigje të gjithë atyre që komentuan ndërrimin e veshjeve të saj gjatë vizitës zyrtare në Ukrainë. Ajo u shpreh se udhëtim ka qenë shumë i gjatë, ku vetëm udhëtimi me tren ka zgjatur 24 orë vajtje-ardhje.
Sipas Spiropalit ndërrimi I veshjeve ishte mbi të gjitha një akt higjenik.
“Unë e fal padijen, por jo ligësinë. Dhe keqardhje e madhe për mënyrën sipërfaqësore sesi disa njerëz, disa portale, e pasqyrojnë përfaqësimin e Shqipërisë aty, sidomos për një anëtare te delegacionit, grua. Ne ishim 24 orë në tren, dhe mbi të gjitha ishte një akt higjenik për të gjithë anëtarët e delegacionit, por sigurisht ne gratë merremi më shumë. U munduam aty të tregonim dinjitetin e Shqipërisë, atë që ka bërë dhe do të bëjë, dhe atë që meriton Ukraina. Nuk kam asnjë koment tjetër se të them të drejtën ligësia më duket qesharake”, është shprehur Spiropali për “News 24”.
