Irani ka pezulluar përkohësisht bashkëpunimin me Agjencinë Ndërkombëtare të Energjisë Bërthamore, duke ndaluar hyrjen e inspektorëve të saj në objektet bërthamore.
Vendimi u zyrtarizua nga presidenti i ri, Masoud Pezeshkian, përmes një akti ligjor të nënshkruar të mërkurën, sipas agjencisë gjysmëzyrtare iraniane Tasnim.
Masa shënon një përshkallëzim të qëndrimit të Teheranit, i cili kërkon garanci për “sigurinë” e objekteve të tij bërthamore.
Sipas autoriteteve iraniane, IAEA duhet të dënojë zyrtarisht sulmet ajrore të SHBA-së dhe Izraelit mbi infrastrukturën bërthamore iraniane dhe të njohë legjitimitetin e programit bërthamor të vendit.
Kryetari i Parlamentit iranian, Mohammad Bagher Ghalibaf, deklaroi se bashkëpunimi nuk do të rifillojë pa këto kushte. Megjithatë, shumë nga hollësitë e legjislacionit të ri mbeten të paqarta.
Ndërkohë, një zëdhënës i Ministrisë së Jashtme të Iranit konfirmoi se inspektorët e IAEA-s ndodhen ende në territorin iranian, por nuk kanë më akses në objektet bërthamore të goditura nga sulmet, përfshirë ato në Fordo, Isfahan dhe Natanz.
Situata erdhi pas një përplasjeje ushtarake të rëndë. Më 13 qershor, Izraeli nisi bombardime të gjera kundër objektivave bërthamore në Iran, duke pretenduar se po vepronte për të penguar krijimin e një arme bërthamore. Irani mohoi kategorikisht çdo synim për armë bërthamore dhe u kundërpërgjigj me sulme raketore dhe dronë.
Më 22 qershor, SHBA-ja ndërhyri me sulme të veta ajrore mbi objektet bërthamore iraniane. Irani deklaroi se si pasojë e konfliktit 12-ditor humbën jetën mbi 900 qytetarë iranianë. Izraeli konfirmoi 28 viktima nga sulmet iraniane.
Presidenti amerikan Donald Trump u shpreh se goditjet amerikane e kishin “shkatërruar” programin bërthamor të Iranit, ndonëse autoritetet iraniane raportuan vetëm dëme “serioze”, pa detajuar shkallën e tyre.
Aktualisht, një armëpushim mes Izraelit dhe Iranit mbetet në fuqi, ndërsa tensionet vazhdojnë të jenë të larta.
