Ministri gjerman për Evropën, Michael Roth ka deklaruar se tashmë ka ardhur koha që Bashkimi Evropian, të mbajë premtimit për çeljen e negociatave për Shqipërinë dhe Maqedoninë e Veriut.
Nëpërmjet një reagimi në Tëitter, Roth ka theksuar se e ardhmja e Ballkanit Perëndimor është europiane. Gjatë një vizite zyrtare të zhvilluar në Shkup , Roth ka thënë që është koha të veprojmë tani.
“Ka ardhur koha që BE të mbajë premtimet për të nisur bisedimet për anëtarësimin e Maqedonisë së Veriut dhe Shqipërisë. E ardhmja e Ballkanit Perëndimor është evropiane – të veprojmë tani me vendosmëri, që të mos ketë dyshime më vonë për të”, ka shkruar Roth.
Ditën e sotme, ministri gjerman vizitoi Maqedoninë e Veriut në kuadër të bisedimeve për hapjen e negociatave. Vizita e Michael Roth është në prag të takimit në qershor të Këshillit të BE-së, ku ai do ta përfaqësojë Gjermaninë.
Kujtojmë se edhe ambasadori gjerman Zingraf foli për negociatat disa ditë më parë nga Korça. Ai shprehu vullnetin e Qeverisë Federale sipas së cilës kushtet nga Shqipëria janë plotësuar për tu anëtarësuar në BE.
“Le të themi që unë shpresoj që bisedimet e anëtarësimit të nisin sa më shpejt të jetë e mundur. Ky është një proces që kërkon mjaft punë, bashkëpunimin e gjithë aktorëve. Projekte të tilla çojnë në plotësimin e standardeve europiane.
Në emër të qeverisë federale për të cilën mua më lejohet të flas. Qeveria federale ka thënë që kushtet janë plotësuar tanimë. Të njëjtën gjë konfirmoi dhe BE. Unë jam optimist për nisjen e negociatave. Por ky është një proces që kërkon dakordësinë e të gjitha vendeve. Ministri federal është pro këtyre negociatave”, tha Zingraf.
