Davide Pecorelli, ish-gjyqtari i futbollit dhe biznesmeni italian i dënuar me katër vite burg nga Gjykata e Shkodrës për inskenimin e vdekjes së tij në Pukë, ka dhënë një intervistë për median italiane La Nazione nga ambientet e burgut 313, ku ndodhet që nga 8 maji i këtij viti, pas ekstradimit nga Italia.
Pecorelli ankohet për kushtet e vështira në burg, ku ndan një qeli prej 16 metrash katrorë me tetë persona të tjerë, pa ujë të rrjedhshëm dhe të rrethuar nga minjtë.
Sipas tij, “tani do të mund të formalizoj rekursin në Gjykatën e Lartë: qëllimi është të marr një masë më pak kufizuese në pritje të gjyqit të shkallës së dytë, i cili është caktuar për 18 shtator”.
Ai ka ndërprerë grevën e urisë pas dy javësh. “Kam vendosur të ndërpres grevën e urisë pas dy javësh. Kam humbur 6 kilogramë”, është shprehur Pecorelli në intervistën për median italiane, duke shtuar se ndonëse kushtet janë ekstreme, ai ka marrëdhënie të mira me të burgosurit e tjerë. “Më trajtojnë mirë, çdo mbrëmje gatuaj makarona për ta: përpiqemi të mbijetojmë, por kushtet janë ekstreme”, tregon ai.
Pecorelli u ekstradua drejt Shqipërisë pas një procesi të gjatë ligjor në Itali. Më 31 mars të këtij viti, Ministria Italiane e Drejtësisë konfirmoi vendimin e gjykatës së Apelit të Perugias, e cila kishte dhënë dritën jeshile për ekstradimin e tij në maj të vitit të kaluar. Vendimi përfundimtar u firmos nga ministri italian i Drejtësisë, Carlo Nordio.
Gjykata e Shkodrës e dënoi Pecorellin më 3 prill 2024 me katër vite burg për disa akuza të rënda, përfshirë “mashtrim”, “dhunim të varreve”, “shkatërrim prone me zjarr”, “kalim të paligjshëm të kufirit” dhe “veprime që pengojnë zbulimin e së vërtetës”. Fillimisht, prokuroria kërkoi tetë vite burg, por gjykata vendosi t’ia përgjysmonte dënimin.
Historia e Davide Pecorellit mori vëmendje të madhe në media që prej janarit 2021, kur ai u zhduk në mënyrë misterioze në Pukë. Atëherë, në një makinë të djegur që ai kishte marrë me qira, u gjetën mbetje skeletore që ngritën dyshime për vdekjen e tij. Por gjithçka rezultoi një inskenim.
Pas nëntë muajsh pa asnjë gjurmë, më 17 shtator 2021, ai u gjet i gjallë pranë ishullit Montecristo në Itali, duke udhëtuar me një gomone. “Po kërkoja një thesar”, ishte deklarata që tronditi opinionin publik, thuajse po aq sa zhdukja dhe rishfaqja e tij e papritur.
Në artikullin e La Nazione, theksohet se pavarësisht kushteve të vështira të burgimit, ai ka akses të përditshëm për të komunikuar me familjen e tij, gruan, katër fëmijët dhe babanë, dhe pret me padurim që të depozitojë rekursin në Gjykatën e Lartë, pas publikimit më 31 korrik të arsyetimit të vendimit nga Gjykata e Apelit e Shqipërisë.
Aktualisht, çështja e tij ndodhet në shqyrtim në Apel, ndërsa ai shpreson që gjykata të shqyrtojë rrethanat dhe të pranojë kërkesën për një masë më të lehtë sigurie.
