Tre persona janë arrestuar pas incidentit të ndodhur mbrëmjen e kaluar në Fier, ku u raportua për një përplasje fizike mes agjentëve të Byrosë Kombëtare të Hetimit, të shoqëruar nga Forcat Operacionale, dhe individëve të afërt me ish-kryebashkiakun e Mallakastrës, Agron Kapllanaj.
Sipas autoriteteve, të arrestuarit akuzohen për “goditje për shkak të detyrës”. Policia njoftoi se rreth orës 19:20, forcat e rendit dhe hetuesit ishin në një mision zyrtar në qarkun e Fierit kur u përballën me agresion fizik.
Tre personat e arrestuar janë Ledjan dhe Klaudio Kapllanaj, nipa të Agron Kapllanajt si edhe shtetasi Gerald Kollçaku.
Nga ana tjetër, Kapllanaj ka dhënë versionin e tij të ngjarjes. Ai pretendon se rreth orës 18:00, një mjet pa targa hyri në parkimin e zyrave të subjektit politik që ai përfaqëson dhe nisi ngritjen e një droni, duke ngjallur dyshime te zyrtarët brenda godinës.
Sipas tij, pas një përplasjeje verbale, mjeti u largua, por u ndoq nga disa persona të lidhur me subjektin politik, përfshirë dy nipërit e tij.
Kapllanaj thekson se gjatë incidentit, agjentët nuk janë identifikuar fillimisht si pjesë e BKH-së dhe sipas tij, kanë përdorur armë për t’i kërcënuar njerëzit e tij.
Ai thotë se më vonë është bërë e ditur se ishin agjentë të BKH-së. Në vendngjarje mbërriti policia që ndërhyri për të qetësuar situatën dhe shoqëroi tre persona në komisariat.
Kapllanaj shtoi se ndodhej vetë në ambientet e policisë për të bërë kallëzim lidhur me rastin.
