Prezenca e OSBE-së në Shqipëri ka reaguar me shqetësim lidhur me incidentet që janë raportuar ndaj gazetarëve gjatë gjithë procesit zgjedhor, përfshirë fushatën, ditën e votimit dhe periudhën e numërimit të votave.
Në deklaratën e saj, OSBE nënvizon se janë shënuar raste të frikësimit dhe pengesave ndaj përfaqësuesve të medias, duke theksuar se liria e shprehjes dhe e informacionit është thelbësore për funksionimin e demokracisë.
“Ritheksojmë rëndësinë jetike të lirisë së medias si një gur themeli i demokracisë dhe shprehim gatishmërinë për të mbështetur çdo përpjekje që synon zbatimin e angazhimeve të OSBE-së për mbrojtjen e gazetarëve dhe garantimin e një mjedisi mediatik të sigurt dhe të hapur,” thuhet në reagimin zyrtar.
Qëndrimi i OSBE-së vjen pas një sërë incidentesh të bëra publike nga organizatat e gazetarëve dhe vëzhgues të pavarur gjatë zgjedhjeve të fundit në Shqipëri.
