Sot po zhvilllon punimet Komisioni Hetimor për Inceneratorët, në të cilin ka pasur përplasje dhe diskutime të shumta midis antarëve të tij.
Valbona Ballgjini ish anëtare e Komisionit të Prokurimit të Inceneratorit të Tiranës ka deklaruar sot se i është dhënë urdhër nga SPAK për të mos dhënë detaje, për shkak të sekretit hetimor.
“Nuk na lejohet të flasim. Erdha për respekt”- ka thënë ajo ndër të tjera teksa Jorida Tabaku, kryetare e këtij Komisioni e paralajmëron se ajo po bën një vepër penale.
Debati i zhvilluar midis tyre:
Ballgjini: Në momentin që jemi thirrur në SPAK na është lënë detyrë që asgjë nuk duhet të dalë përtej asaj që është diskutuar. Unë kam ardhur këtu në respekt të punës tuaj, por që unë nuk mund të jap asnjë detaje dhe më është thënë nga SPAK është pjesë e sekretit hetimor.
Tabaku: Keni informacione për tja komunikuar komisionit, një shkresa nga SPAK?
Ballgjini: Duke qenë se është pjesë e sekretit hetimor edhe deklaratat nuk na janë dhëne, nuk na lejohet të flasim
Tabaku: Bazuar mbi komunikimet e zotit Shalsi ne prokurorët ne vendosëm të firmosnin një deklaratë për këtë që thatë. Këtë procedurë e kemi kaluar njëherë, por duam të jemi produktivë. Kështu që unë mendoj që me zonjën Ballgjni të operojmë siç operuam me zotërinë nga inceneratori i Fierit
Shalsi: E kam theksuar disa herë në këtë mbledhje sesa të kujdesshëm jemi kur i drejtohemi dëshmitarëve, por edhe njëri tjetrit. Këtu kam pjesë të procesverbalit dhe çfarë kam thënë unë. Unë kam përmendur studentë të fakultetit juridik të cilët bashkë me pedagogë po ndjekin edhe për eksperiencë se çfarë themi ne. Kam cituar gjyqtarë dhe prokurorë që janë të shqetësuar se mos me dashje apo pa dashje ne po ndikojmë dhe cenojmë një hetim paralel që organet po bëjnë.
Unë kam sjellë një shqetësim i cili po interpretohet nga studios të botës akademike. Ne këtu jemi për të hedhur dritë mbi të vërteten dhe ne nuk bëhemi mbrojtës për askënd që ka probleme me ligjin. Ne po jemi dhe nuk mund të mos shprehim shqetësime për interpretimet apo komentet e disa deputetëve që shqetëson komunitetin. Citoni drejt çfarë themi.
Tabaku: Duke refuzuar për të dëshmuar është duke kryer një vepër penale.
