Ilir Meta, presidenti i Partisë së Lirisë, ka deklaruar në një intervistë se është krenar për qëndrimet politike që ka mbajtur gjatë karrierës së tij.
Meta tha se, gjatë 34 viteve të angazhimit të tij, ka pasur raste kur ka ndarë pikëpamje dhe bashkëpunim me Edi Ramën, por ka denoncuar çdo shkelje që i ka konsideruar të padrejta.
“Jam besimplotë që kjo përpjekje kriminale për të nxjerrë më dhunë nga politika Ilir Metën do të dështojnë. Historia e 30 viteve që kanë kaluar nuk do të rishkruhet sipas delireve te Edi Ramës dhe e ardhmja do e ndëshkojë siç e meriton, bashkë me mercenarët që përdor sot. E ardhmja u përket shqiptarëve dhe patriotëve,” tha Meta.
Meta pretendon se është presidenti i parë i Shqipërisë i rrëmbyer në mënyrë banditeske.
“Këto statistika nuk kanë asnjë domethënie për mua. Unë jam presidenti i parë i rrëmbyer në mënyrë banditeske, pa asnjë letër dhe procedurë normale, siç e keni parë të gjithë dhe jam një nga ata 30 studentë që me në krye Azem Hajdarin përfaqësuam lëvizjen studentore në atë natë të paharrueshme ku Ramiz Alia u detyrua të pranonte pluralizmin politik”, deklaroi Meta në intervistën në emisionin “Dekalog”.
